Îndî Elisha aramûcokeria aramwîra, “Thikîîra ûrîa MWATHANI akuuga, ‘Rûûjû thaa ta îîjî kilo ithatû cia mûtu jwa nkano ikaagûrwa na fetha îmwe. Nacio kilo ithanthatû cia mûnyaki ikaagûragwa o ûu mpingîroone ya Samaria.’”
Naku nî kwaarî na antû bana baarî na mûrimo jwa mûtigiri baakaraga oome ya mpingîro ya ntûûra ya Samaria. Bareerana atîrî, “Ga tûgaakara aja mwanka tûkue?
MWATHANI nî aarî agûtûma njûûrî ya Sîria iigua gîtuma ta kîa njûûrî înene îrî na mbarathi na ngaarî cia ndwaa. Nabo asikarî bareerana atîrî, “Mûnene wa Israeli agûtwîtîra njûûrî ya mûnene wa Ahiti na ya Misri ciîja gûtûthiria.”
Tontû bûû, Asîria baaramatûka kûrî na marwîrwî, baratiga maema jaao, na mbarathi ciaao, na ntigiri ciaao, na kambî îkari o ûrîa yaambi, baramatûka nîkenda batîûragwa.
Rîrîa antû bau ba mûtigiri baakinyîre kambîîne nî baatonyere îemeene rîmwe, bararîa na baranyua, na barajûkia fetha na thaabu na nguû, bareeta baraitha into biu. Baracoka barakûrûka îemeene rîngî barajûkia into ku bareeta barabiitha.
Nabo bareeta ntûûreene bareeta akaria ba mpingîro barabeera atîrî, “Tuumîte kambîîne ya antû ba Sîria na gûtî muntû noo ûmwe tûroona kana twigua mûgambo jwa muntû, tiga mbarathi na ntigiri itheeki na maema jakari o ûrîa jaraambi.”
Nabo antû ba ntûûra ya Samaria baraumagaranga na mpwîî bareeta gûtaa kambî ya Sîria. Tontû bûû, kilo ithatû cia mûtu jwa nkano iratua kûgûragwa na fetha îmwe, na cio kilo ithanthatû cia mûnyaki iratua kûgûragwa na mbeecha o ta iu, o ta ûrîa MWATHANI augîîte.
Nîkwîthîrwa Elisha nî aarî akwîra mûnene atîrî, “Kilo ithanthatû cia mûnyaki ikaagûrwa na fetha îmwe, nacio kilo ithatû cia mûtu jwa nkano kinya cio ikaagûrwa na fetha îmwe îgiiteene ta rîrî rûûjû mpingîroone ya Samaria,”