Elaisâh ta a sawchapawpa a pahro heihpa chanô hnohna kha ta, “Thyu la, na chhôhkha chhao ta nama y theina su lâ kei y chy muh vy. Abeipa ta chakâhna aw ha ta, râh liana he kô sari chhôh chakâhna a tlô aw,” tah ta.
Elaisâh ta athihpa a pathyuna thâtih Kehâzi ta abei a chho hai nota, a sawchapawpa a pahro heihpa chanô chata a o nata a lyu abei hnohta vaw hiah ta. Kehâzi ta, “Ei zibeipa, Hy abei y, he he chanô cha a châ. He he Elaisâh ta a pahro heihpa a sawchapawpa cha a châ,” tah ta.
Abei ta chanô cha hiahri ta, chanô ta â dozie chho ta. Abei ta hyutuhpa pakha rao ta, a hnohta, “Ano eih zydua pie pakhua la, râh a puasai noh tawhta tahmâ taihta a lyuzy liata kô a veihpa zydua chhao pie pakhua khai mah y,” tah ta.
Abei ta Hâze hnohta, “Kuhria a chei la, Khazohpa chyhsa cha a kei hmô la, ano hmâpa ta Abeipa a kei saohiah la, a hnohta, ‘He pasana tawh heta ei tlâh thei aw ma?’ tahpa ta na hiahripa mah y,” tah ta.
Hâze cha Khazohpa chyhsa a hmô awpa ta sie ta. Kuhria châta Dâmaskâ liata hmo phapa to, râraoseihpa sypalih phao tlai phaopa ta. A tlô nahta, a hmiakô liata a kei duah ta, a hnohta, “Na sawchapawpa Aramia bei Benhadâ ta, ‘He pasana tawh heta ei tlâh thei aw ma,’ tahpa ta cha hiahri awpa ta nâ lâta eina vaw tuah,” tah ta.
Elaisâh ta a hnohta, “Sie la, a hnohta, ‘Na tlâh heih tlai aw,’ tahpa ta kei chho mah y. Châhrasala a thi tlai aw tahpa ta Abeipa ta eina pahmôsa,” tah ta.
Hâze ta, “Ei zibeipa cha khazia ma a cha tly?” tah ta. Khazohpa chyhsa ta a chhy ta, “Izarei sawzy chô liata hmo pha leipa na tao awpa ei pahnopa vâta a châ. Ama thokhyzy rao aw chi ta, ama satliazy zaozi ta thie aw chi ta, ama hawtizy taichheih aw chi ta, saw phaohpa ama chanôzy py na pahy aw,” tah ta.
Hâze ta, “Châ chakaotuhpa he khâpa ma a châ tly, i deita châ ta, kheihta ma cha hawhpa hmo rônahpa cha a tao thei aw?” tah ta. Elaisâh ta a chhy ta, “Aramia chô liata nâ bei aw tahpa Abeipa ta eina pahmôsa haw,” tah ta.
Hâze cha Elaisâh tawhta pua ta, a zibeipa kô a tlô nahta, a zibeipa ta, “Elaisâh ta khâpa a cha chho?” tah ta. Ano ta, “Na tlâh heih tlai aw, tahpa ta eina chho,” tah ta.
Châhrasala a mylâ ta poh chhapa la ta, ti liata ny ta, cha chata Benhadâ cha a thina taihta a hmia pahly ta. Chatanachata Hâze cha ano su liata a bei ha ta.
Zehôsaphâ Zudâh bei a châ nota, Ahabâ sawchapawpa Zôrâ cha Izarei liata a bei ta, â beina kô pangawhna liata Zehôsaphâ sawchapawpa Zehôrâ cha Zudâh liata abei pathao ta.
Ahabâ sawchanô lapinô ta a hneipa vâta, Ahabâ chhôhkha taozie hawhta, Izarei beizy lâpi a chhi hrapa ta, Abeipa mohmô liata hmo pha lei ngaitapa tao ta.
Châhrasala Abeipa ta Dâvi nata a pathlazy cha chhâzaw ta meiôh pie awpa ta bie â vaw taih hapa vâta, a chakaotuhpa Dâvi zawhzi ta Zudâh cha pahleipadia khoh vei.
Zôrâ cha Zairâ khih lâ a talailih zydua chhaota sie ta. Zâ ta pua ta, ano nata a talailih hyutuhpazy ta âmo a dôhpa Edômâ mo cha a kei dyuh ei ta. A pheisaihzy deikua cha ama poh o chyu lâta a râ khai ha ei ta.
Bei Zôrâ cha Aramia bei Hâze amâ dyuhna liata Aramia mo ta Râmâ khih liata hmah ama paphaopa cha, Zezari khih liata a patlâ awpa ta kua ta. Zudâh bei Zehôrâ sawchapawpa Ahazia cha Ahabâ sawchapawpa Zôrâ a pasapa vâta a hmô awpa ta Zezari khih lâ zu ta.