O nwọn ogẹn Ẹlaịsha gi gwa okpoho Shunẹm hụ ọ kpọtiẹn nwa a ọnwụn, “Yụ lẹ ezi-lẹ-ụlọ ị gha nị alịnị pụ; jẹn ni ebe ọwụlẹ ụnụ k'a saẹka d'e biri, makẹni Osolobuẹ e kuọl'a nị ụnwụn k'a rị alịnị ahụa ẹsa.”
Ya eze nọ jụ okpoho hụ ukwere ẹ. Okpoho hụ nọ kọnị eze k'o mẹ. Eze nọ ye ẹ onyẹ-ọrụn ohu, sị a d'e yekin okpoho hụ ihiẹn ẹ ile lẹ egho ile wẹ re ihiẹn alị a mẹ kete ọ ghalẹ alị hụ pụ.
Ya Hazaẹlụ nọ jẹnmẹ d'e kunrun Ẹlaịsha, o buhụ ihiẹn ichẹn-ichẹn rị mma rị alị Damaskọsụ o bujẹnkọn'a; anyịnyan mkpukpuke ọgụnnaị k'o gi bu wẹ. Ọ nọ banye, sị a, “Nwa ị wụ Bẹn-Hadadị eze Aram zi m d'a jụ kẹ n'ọ dịnhịn emuni rị a kụn'a ra ọ dịnhịnkọ?”
Ya Hazaẹlụ nọ sị a, “Diọkpa, kị ị rị a kwannị?” Ya Ẹlaịsha nọ sị a, “Makẹni a marịngụọ m eje-ihiẹn ile i jẹnkọ d'e mẹ ndị Izrẹlụ: i jẹnkọ d'e gi ọkụn dụnpụchanrịn ebe ile zeni wẹ tụn w'a gbaban ogẹn agha, gi ọpịa-agha gbuchanrịn ikorọbịa wẹ; gi ụmụ wẹ fịan alị, wasọnmẹ ikpoho wẹ rị-imẹ ẹfọ.”
Ya Hazaẹlụ nọ gha ebe Ẹlaịsha rị pụ; ọ nọ jẹnmẹ d'e kunrun di-nwọnn'ẹ wụ eze. Eze nọ sị a, “Kịnị kẹ Ẹlaịsha ku?” Ọ nọ sị a, “Ọ sị mmẹ zi i n'i jẹnkọ d'a dịnhịnrịrị.”
Ya Joram nọ fetu, shi Zairi, ya lẹ ụgbọ-ẹshin agha a ile, d'a maye ndị Ẹdọm. Ndị Ẹdọm nọ kehunmẹ ya lẹ ndị-agha hụn a kịn'a ụgbọ-anyịnyan ndị hụ, kanị, ọ nọ gi imẹ abalị maye wẹ, karị wẹ ẹka, gbapu, ndị-agha a nkẹ nọ gbala.
Joram nọ lakin Jezriẹlụ d'a zụọ enwẹn ẹ yeni ẹhụ hụ wẹ rụ a imẹ Ramọtụ. Ya kẹ eze Juda wụ Ahazia nwa Jehoram nọ jẹn Jezriẹlụ d'a hụn Joram nwa Ehabụ makẹni ọ rụ ẹhụ.