Kä min lätdɛ kuäär ɣöö ci Ɛ-li-cä raan jiɛc li̱th, nɛnɛ, cu ciek ëë ca gatdɛ tek ben kä kuäär kɛ kui̱ dhɔaarɛ kɛnɛ mundɛ. Kä cu Ge-ɣä-dhi wee, “Kuäärä jɛn ɛn, ɛn ciek kɛnɛ gatdɛ mëë ci Ɛ-li-cä jɛ jak kä tëk.”
Kä min ci kuäär ciek thiec, cuɛ la̱t jɛ. Kä cu kuäär raan kɔarɛ jiök i̱, “Luc ni jɛ nyinkɛ diaal, amäni tëë diaal tëë ci ciɛk muun nikɛ cäŋ ëë jiɛn kɛ jɛ muun amäni walɛ.”
Kä cu Ɣä-dha-el wä jëk kɛ jɛ, kä cuɛ muc naŋ kɛɛl kɛ jɛ ŋɔak diaal tin gɔw kä Da-math-kɛth ti kapkɛ ɛ thɔ̱a̱rɔa̱a̱li ti jiɛn ŋuaan. Kä min cɛ ben nyuur nhiam Ɛ-li-cä cuɛ wee, “Ci gatdu ni Bɛn-a-dad kuäär Thi-ri-ya ɣä jäk kä ji̱ i̱, ‘Ɣän bä rɔ jiɛc kä juey ɛmɛ?’ ”
Kä cu Ɣä-dha-el ɛ thiec i̱, “Ɛŋu wiee i̱ mɔ kuäärä?” Kä cuɛ loc i̱, “Kɛ ɣöö ŋa̱cä min jiääk in bi lät kä ji̱ I-thɛ-rɛl. Bi wi̱i̱kiɛn tin buɔ̱m buɔ̱ɔ̱m cua̱th, kä bi ŋuɛ̈tnikiɛn näk kɛ mut, kä bi nyin tiɛtnikiɛn thum, kä bi ruëtnikiɛn rɛt kä piny.”
Kä cu Ɣä-dha-el wee, “Kä dëë lua̱ŋ mi la̱tdä mi ce̱tkɛ nɔ di̱i̱t ɔ jek nikä, kä ɛ ɣän ram mi jio̱k?” Kä cu Ɛ-li-cä jɛ loc i̱ “Ci Kuoth Nhial ɛ nyuɔ̱th ɣä ɛn ɣöö bia̱ kuäär kä Thi-ri-ya.”
Kä cuɛ guɔ̱r ni duɔ̱ɔ̱p kua̱r thuk duëli kuec caam, ce̱tnikɛ mëë ca la̱t dhɔr Ɛ̈-ɣab, kɛ ɣöö cɛ nya Ɛ̈-ɣab kuɛn. Kä cuɛ la̱t ni jiäk nhiam Kuɔth Nhial.
Kä cu Yɛ-ɣo-ram lɛni wä kä Dha-yir kɛ thurbiɛɛlikɛ diaal. Kä cu ji̱ Ɛ-dɔm jɛ go̱l ɛ, kɛ wäär, cuɛ rɔ jiɛc kɛnɛ bööth thurbiɛɛlikɛ, cukɛ ji̱ Ɛ-dɔm näk, kä cu rɛmdɛ rɔ̱ bar dho̱rikiɛn.
Mëë tokɛ kuäär tëë kɛ run ti jiɛn da̱ŋ rɛw wi̱cdɛ rɛw, kä cuɛ ruëc kɛ ruɔ̱n kɛl kä Jɛ-ru-tha-lɛm. Kä cɔalkɛ man i̱ Ä-thɛ̈l-yaa. Ɛ nya nya Ɔmri kuäär I-thɛ-rɛl.
Kä cu kuäär ni Yo-ram loc kä Yidh-rɛɛl kɛ ɣöö bi buɔ̱t in ca ka̱m jɛ ɛ ji̱ Thi-ri-ya kä Rama. Mëë nyieenykɛ kɛ Ɣä-dha-el kuäär Thi-ri-ya wä gɔaa thi̱n. Kä cu Ä-ɣɛ̈dh-yaa gat Yɛ-ɣo-ram kuäär Juda wä wëë Yo-ram gat Ɛ̈-ɣab wä gui̱l kɛ buɔ̱tdɛ kä Yidh-rɛɛl.