O Eliseo dia orba e diskiniaia kai vou cherdaia te ustel lako chaurro katar o meripe, ta phenda lake te llaltar voi ta laki familia te zivin ande aver phuv, soke o Del phendaia kai ka avel bari bok efta burs.
Ta kana phenela leke sar o Eliseo cherdaia te ustel katar o meripe iekhe llene kai muloa, e diskinia kai o Eliseo cherdaia lako chaurro te ustel katar o meripe avili te mangel katar o charo te irin lake lako cher ta laki phuv. Ondaka o Gejazi phenda e charoke: Glamno charo, gaia si e diskinia ta gava si lako chaurro kai o Eliseo cherda te ustel katar o meripe.
O charo puchla e diskinia ta voi phenda leke so avilape. Mapalal o charo phenda iekhe sudoke te irin lake sa lake ezgode, ta te irin lake sa e septelie kai diaia laki phuv sar kana llelitar te zivil ande aver phuv llik allive.
Mapalal katar gale ezgode o Eliseo llelo ando Damasko. Ande gua vreme o Ben Adad kai saia o charo katar e Siria saia nasualo, ta phende leke kai avilo o profeta.
Ondaka o charo phenda e Jazaeleke: Inllar iek sukar ezgoda ta lla dikh e profeta, ta mang letar te puchel e Devle dal ka sastivav katar gava nasualipe.
Ta o Jazael llelo te dikhel e Eliseo ta inllarda ande po va iek sukar ezgoda, ta i inllarda upral pe saranda deve e mai sukar ezgode katar o Damasko. Kana avilo phenda leke: O charo katar e Siria o Ben Adad kai si sargo cho chaurro, bichalda man tute te puchav tut dal vou ka sastol katar po nasualipe o iok.
ta o Jazael puchla le: ¿Soke rove mo gazda? O Eliseo phenda leke: Soke llanav o bilachipe kai ka chere e llenenge katar o Israel. Ka phabare lenge forura zidome, e jarniea ka mundare e ternen ta lenge minonen ka chalave len ande phuv, ta ka putare o lli katar e diskinie kai si khamne.
O Jazael llelotar katar o Eliseo ta avilo kai o charo kai puchla le: ¿So phenda chuke o Eliseo? O Jazael phenda leke: O Eliseo phenda mange kai ka sasto.
Kana saia o panchto burs sar kana thodape te charoil ando Israel o Joram chavo katar o Ajab, thodape te charoil ando Juda o Joram chavo katar o Josafat.
Ta cherda o bilachipe gia sar cherde e charura katar o Israel ta e vicha katar o Ajab. Leki rromi sai chorri e Ajabeki, ta cherda o bilachipe angla o Del.
Sea leke bis ta dui burs kana thodape te charoil. Charoisarda ando Jerusalem iek burs. Leki dei ikhardola Atalia ta saia katar e familia katar o Omri, o charo katar o Israel.
ta o Joram irisailo ando Jezreel te sastol katar po ranipe kai cherde leke e siriura kana mardape e charoia e Jazaelea angla o Ramot. Ondaka o Okosias llelo ando Jezreel te dikhel le.