Eka ikaw puga mar mo, iol e wiye, kikone ni Ruoth Nyasaye owachone ni oseyiere mondo obed ruodh Israel. Ka isewacho kamano, to yaw dhoot iring ia. Kik ideki!”
Mi Jehu noa malo, modonjo e ot. Eka janabino noolo mo e wiye, kawachone ni Ruoth Nyasaye ma Nyasach Israel owacho niya, “Aseyieri mondo ibed ruodh Israel.
Eka Jehu noidho gache, modhi Jezreel, nimar Joram ne ni kuno. To Ahazia ruodh Juda bende ne ni kuno, ka wendo Joram. (Ruoth Joram ne ni Jezreel mondo ochang kuom hinyruok mane oyudo e lwet jo-Aram Ramoth-gilead gi jo-Israel duto, mondo kik Hazael ruodh Aram kaw.)
Jarito mane oyudo ochung’ ewi ohinga mar Jezreel noneno Jehu gi joge ka biro, mowacho niya, “Aneno ji moko, ka biro.” Joram nowachone ni, “Or ng’ato gi faras odhi oromnigi, mondo openjgi ka wach ber.”
Omiyo jaidh faras nodhi romonigi, mowachonigi niya, “Ruoth penjo ka wach ber.” To Jehu nodwoke niya, “Wach maber obadhie ang’o? Wichri ilu bang’a.” Jarito mane ni ewi ohinga nochako owacho niya, “Jaote cha osechopo irgi, to ok ane koduogo.”
Jarito nowacho kendo niya, “Jaoteno osechopo irgi, to en bende ok oduogi. To jariemb gari cha chalo mana gi Jehu wuod Nimshi, nikech oriembo matek ka janeko.”
Joram nowacho ni joge mondo oikne gache, mi ne gitimo kamano. Eka Joram ruodh Israel, kod Ahazia ruodh Juda, ne jowuok gi gechegi, ka dhi romo ni Jehu, mi ne giromo kode e puoth Naboth ja-Jezreel.
Eka Jehu nowacho ni Bidkar mane jating’ne gilweny niya, “Kawe, ibole e puoth Naboth ja-Jezreel. Ok ipar gima Ruoth Nyasaye nowacho kuome chieng’ mane wan kodi e gach lweny, kwaluwo bang’ Ahab wuon mare?