×

Ika Bible 2018

1 Ihiẹn Mẹni 10

1
Ndị Filistia lụsọn ndị Izrẹlụ ọgụn, ndị Izrẹlụ nọ gbanị wẹ ọsọ, wẹ nọ gbu ndị Izrẹlụ bu ọda tọ Ugu-Gil'bụa.
2
Ogẹn hụ, ndị Filistia nọ chụrụ Sọlụ lẹ ụmụ a, kehunmẹ wẹ, wẹ nọ gbu ụmụ a wụ Jonatanị, Abinadabụ lẹ Mal'ki-Shụa.
3
Ọgụn e ke Sọlụ ye, ogẹn ndị a gba ụta gi hụn a, wẹ nọ gba a ụta rụ a eje-ẹhụ.
4
Sọlụ nọ sị onyẹ hụn e bun'ẹ ihiẹn-ọgụn, “Sepụha ọpịa-agha ị n'i gi ẹ zugbu m, amamgbe ndịnị kwalẹni ugun a bịa d'e mẹ m ihiẹn-ụya.” Kanị egun anịnị hụn e bun'ẹ ihiẹn-ọgụn m'ẹ; ya Sọlụ nọ gwarị weri ọpịa-agha ya lẹ enwẹn ẹ, dankwasị a.
5
Hụn e bun'ẹ ihiẹn-ọgụn a hụn a nị Sọlụ a nwụnhụn, ya nwẹn nọ dankwasị ọpịa-agha nke ẹ, nwụnhụn.
6
Ya Sọlụ lẹ ụmụ a ikẹnnyẹ ẹtọ nọ nwụnhụn, ikpụlọ a ile e gi mgbe ohu nwụnchanrịn.
7
Ogẹn ndị Izrẹlụ ile rị ọdanmgbugbu ahụn gi hụn a nị ndị-agha Izrẹlụ a gbagụọ ọsọ, nị Sọlụ lẹ ụmụ a ikẹnnyẹ a nwụnhụngụọ, wẹ nọ gba obodo ndị wẹ bi tọ. Ndị Filistia nọ bịa d'e bikinsọnmẹ obodo ndị ahụn.
8
Eki e fọn, hụn ndị Filistia gi bịa d'e kpọnrin ihiẹn ndị nwụnnị, wẹ nọ hụn Sọlụ lẹ ụmụ a ebe wẹ dantọ elu Ugu-Gil'bụa.
9
Wẹ nọ gbụnarịn a ihiẹn ẹ, beri ẹ isi, buru ihiẹn-ọgụn a, zi ndị ụkọ ghagbama alị ndị Filistia ile d'a hịsọnmẹ ẹ kẹ ihun mmọn wẹ ichẹn-ichẹn kẹ imẹ igunrun ndị nke wẹ.
10
Wẹ nọ bu ihiẹn-ọgụn a tọ ụlọ-mmọn wẹ, kọn isi ẹ ye ụlọ mmọn Dagọnụ.
11
Mgbe ndị ile bi Jabẹshi-Gilẹdị gi nụ ihiẹn ile ndị Filistia mẹ Sọlụ,
12
ndị ile nwọn obi imẹ wẹ nọ wịrị jẹn d'e buru ozun Sọlụ lẹ ụmụ a, bulụa wẹ Jabẹshi. Wẹ nọ li ọkpụkpụ wẹ ye okpuru okẹn osisi rị Jabẹshi, bu ọnụ akp'ọhịn ẹsa, kwan wẹ.
13
Sọlụ nwụnhụn makẹni o gi ẹka-ẹbụọ sọn Osolobuẹ; o mẹni ihiẹn Osolobuẹ ku — o jẹnghọdẹ d'a gba ẹfa,
14
hụn nkẹ o gi chọ uche Osolobuẹ. Ya haịn Osolobuẹ gi gbu ẹ, we alị-eze Izrẹlụ ye Defidi nwa Jese.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes