×

Ika Bible 2018

1 Ihiẹn Mẹni 11

1
Ndị Izrẹlụ ile nọ zu, bịa d'e kunrun Defidi imẹ obodo Hibrọnụ, sị a, “Ẹnyi lẹ ịyụ wụ umunẹ; ẹdeke ohu kẹ ẹnyi wụ.
2
Ogẹn mbụ ahụn Sọlụ gi wụ eze, ịyụ wụ onyẹ hụn a kịjẹn Izrẹlụ agha, a kịlụa. Osolobuẹ wụ Chuku i sị, ‘Ịyụ nwọn du ndị nke m wụ Izrẹlụ nọkẹ onyẹ-ndu anụ; ịyụ nwọn kị wẹ.’ ”
3
Ogẹn ndị-ichẹn Izrẹlụ ile gi bịagụ Hibrọnụ d'e kunrun Eze wụ Defidi, ya lẹ wẹ nọ kwetarị nkwa ihun Osolobuẹ, wẹ nọ kin Defidi eze Izrẹlụ kẹ Osolobuẹ dọn ku ẹ ghahanị Samuẹlụ.
4
Defidi lẹ ndị Izrẹlụ ile nọ dọnshi Jerusalẹm (ya wụ Jebusu). Ndị Jebusu bi ebẹhụ nọ
5
sị Defidi, “Y'a sakọ ẹka banhan ebeni.” Kanị Defidi a saghọ ẹka banhan, weri Zayọnụ, ebẹhụ zegbu enwẹn ẹ ọ banye, ọ nọ họnrin Obodo Defidi.
6
Defidi gwa ndị agha a ụhụọhịn ahụn, sị, “Onyẹ ibuzọ k'e mẹri ndị Jebusu agha k'a wụrụ onyẹ-isi agha.” Jụabụ nwa Zeruaya buzọ jẹn elu ebẹhụ d'a maye wẹ, ọ nọ weri nzere hụ.
7
Ya Defidi nọ biri imẹ obodo hụ fụ ọrụn ọbanye, ya wẹ nọ nwan kpọma ebẹhụ “obodo Defidi”.
8
Ọ nọ tụndọnzi obodo Jerusalẹm ghahunmẹ Zayọnụ, ebe ile hụn nọkunmẹchanrịn Ugu Zayọnụ — gha mkpọnyin wẹ gi e nyin Zayọnụ d'e ru ụgba wẹ gi ghahunmẹ Zayọnụ, Jụabụ nkẹ nọ dọnzi ebe ile họdụnị imẹ Jerusalẹm.
9
Defidi hụ e mẹri omẹri-omẹri, makẹni Osolobuẹ ihiẹn ile rị okpuru ẹ nọyen'ẹ.
10
Ndịnị wụ ndị-isi imẹ ndị-odogun agha Defidi, wẹ lẹ Izrẹlụ ile gba kwadọn ọkịkị a hụn o gi kịgbarị alị Izrẹlụ ile kẹ Osolobuẹ dọn kwe nkwa.
11
Ndịnị wụ ẹfan ndị odogun-agha Defidi: Jashobịam onyẹ Hak'mọnụ hụn kachanrịnnị imẹ ndị odogun-agha. Ịya wụ hụn gi obo ẹ lụsọn mmadụ ọgụn-mmisẹn ọgụn, gbu wẹ ile.
12
Hụn e sọnn'ẹ wụ Ẹliẹza nwa Dodaị onyẹ Ahọ, ọ rịzị imẹ ndị odogun-agha ẹtọ kachanrịnnị,
13
Ya lẹ Defidi rị imẹ Pasị-Damim ogẹn ahụn ndị Filistia gi lụsọn wẹ ọgụn ebẹhụ, imẹ ugbo ọka-bali jun, ndị agha Izrẹlụ ile nọ gbanị ndị Filistia ọsọ.
14
Kanị Ẹliẹza nwa Dodaị lẹ Defidi nọ che wẹ ọgụn ahanmahan ugbo ahụn, gbu ndị Filistia, Osolobuẹ nọ gi ihiẹnni ye Izrẹlụ okẹn mmẹri.
15
O nwọn ogẹn madụ ẹtọ imẹ ndị odogun-agha Defidi iri kwasị ọgụn gi bịa d'e kunrun Defidi imẹ okporo ọmụma rị Adulam. Ndị-agha Filistia rị ọdanmgbugbu ndị Rẹfa ogẹn hụ e che nị wẹ lụsọn Izrẹlụ agha.
16
Defidi warị ebẹhụ e che ẹhụ ogẹn hụ, ndị Filistia nkẹ e werigụọ Bẹt'lẹhẹm, bu ndị-agha tọ ebẹhụ.
17
Ẹgụn mirin rị a gụn Defidi, ọ nọ sị, “K'ọ rị m e ye wẹ m mirin ọmị nọkunmẹ ọnụ-mgbọn Bẹt'lẹhẹm ra!”
18
Ya kẹ Madụ Ẹtọ Ahụn nọ lụsọn ndị Filistia ọgụn, ghafe, dọrị mirin ọmị ahụn nọkunmẹ ọnụ-mgbọn Bẹt'lẹhẹm, buhẹni Defidi ya. Kanị Defidi ekwezini nwan ra a. Hụn nkẹ o gi ra a, ọ nọ hu ẹ yeni Osolobuẹ,
19
Sị, “Osolobuẹ anịkwọlẹ m mẹ ihiẹn nọ ẹnịna! Nị m ra? Hụnnị wụ ịra ẹdeke ndịnị bu ndụn wẹ che ọb'ẹka jẹn d'a dọha a?!” Ọ ran'a nwan. Ẹrịra kẹ ndị odogun-agha ẹtịtọ ahụn kanị dọn kpasọnmẹ ikẹn.
20
Abishaị nwẹnẹ Jụabụ kị Madụ Iri-kwasị-ọgụn Ahụn. O gi obo sụọ lụsọn mmadụ ọgụn-mmisẹn ọgụn, gbuchanrịn wẹ, ẹfan a nọ kpọma kẹ nke Madụ Ẹtọ Ahụn.
21
Ịya ka Ndị-odogun Iri-kwasị-ọgụn Ahụn ọhụnma-ọhụnma, o họnrin onyẹ-isi wẹ, ọsụọn'a nị agụnnị w'a ye imẹ Ndị odogun-agha Ẹtọ.
22
Bẹnaya nwa Jehoyada ma lụ ọgụn ọda-ọda; onyẹ obodo Kabzilu k'ọ wụ. Ọ kpa ikẹn ọda-ọda. Ịya gbu ndị dikẹn ẹbụọ ka ibe wẹ ikẹn imẹ ndị-agha alị Mụabụ. Ịya banyezikwọ imẹ olu ụhụọhịn mirin ọchan a kpụkpụrụnị wụ sno hụn a tụ eje-oyi rị e ziẹn, gbu ẹwọrọ.
23
O gbuzighọ onyẹ Ijiptu ohu, hụn usue ẹ wụ ọb'ụkụ ẹsa lẹ nkirishi, ọsụọn'a nị onyẹ Ijiptu ahụn bu obo hụn nọ kẹ ẹgbe wẹ gi a kpa ẹkwa; Bẹnaya hụn gihụ mkpụrụ-ẹgbe nọ sọn ẹ; ọ zụọnarịn onyẹ Ijiptu hụ ẹregede obo ẹ, gi ẹ gbu onyẹ Ijiptu hụ.
24
Ẹnịna kẹ Bẹnaya nwa Jehoyada kpasọnmẹ ikẹn; ẹfan ya nwẹn kpọzịkwọ kẹ nke Ndị odogun-agha Ẹtọ ahụn dọn kpọ.
25
Ịya ka ndị-odogun agha iri kwasị ọgụn Ahụn, ọsụọn'a nị agụnnị w'a yeni Ndị Odogun-agha Ẹtọ hụ kachanrịnnị. Defidi tumẹ ẹ onyẹ-isi ndị e che ẹ nche.
26
Ndị odogun-agha iri kwasị ọgụn ahụn wụ ndịnị: Asahẹlụ nwẹnẹ Jụabụ. Ẹl'hananị nwa Dodo onyẹ Bẹt'lẹhẹm,
27
Shamọtụ onyẹ Haro, Hẹlẹzi onyẹ Pẹlọnụ,
28
Ira nwa Ikeshi onyẹ Tẹkụa, Abiẹza onyẹ Anatọtụ,
29
Sibẹkaị onyẹ Husha, Ilaị onyẹ Ahọ,
30
Maharaị onyẹ Netofa, Hẹlẹdi nwa Baana onyẹ Netofa.
31
Itaị nwa Ribaị onyẹ Gibia rị Bẹnjamini, Bẹnaya onyẹ Piratọnụ,
32
Huraị onyẹ alị Ọdanmgbugbu rịsọnmẹ Gaashị, Abiẹlụ onyẹ Ar'ba.
33
Az'mavẹti onyẹ Baharum, Ẹliaba onyẹ Shaalubọnụ.
34
Ụmụ Hashẹm onyẹ Gizọ, Jonatanị nwa Shagẹ (Shaama) onyẹ Hara.
35
Ahịam nwa Saka onyẹ Hara, Ẹlifalụ nwa Uru
36
Hẹfa onyẹ Mẹkẹra, Ahija onyẹ Pẹlọnụ.
37
Hẹz'ro (Hẹzraị) onyẹ Kamẹlụ, Naaraị nwa Ẹz'baị,
38
Juwẹlụ nwẹnẹ Natanị, Mibha nwa Hagri,
39
Zẹlẹki onyẹ Amọnụ, Naharaị onyẹ Biẹrọtụ hụn e buni Jụabụ nwa Zeruaya ihiẹn-ọgụn,
40
Ira onyẹ Itri, Garẹbụ onyẹ Itri,
41
Yuria onyẹ Hẹti, Zabadị nwa Ah'laị.
42
Adina nwa Shiza onyẹ Rubẹni hụn wụ onyẹ-isi ndị ebọn Rubẹni lẹ mmadụ iri kwasị ọgụn wẹ lẹ Adina wị,
43
Hanan nwa Maaka, Joshafatị onyẹ Mitẹni,
44
Uzịa onyẹ Ash'tarọtụ, Shama lẹ Jẹyẹlụ ụmụ Hotam onyẹ Arụa,
45
Jediẹlụ nwa Shimri lẹ nwẹnẹ ẹ wụ Joha onyẹ Tizi.
46
Ẹliẹlụ onyẹ Mahavụ, Jeribaị lẹ Joshavia ụmụ Ẹl'nam, Itma onyẹ alị Mụabụ
47
lẹzi ndị Mezoba ẹtọ wụ Ẹliẹlụ, Obẹdi lẹ Jasiẹlụ.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes