×

WẼNNAAM SEBRE 2014

1 NA-ROT 12

1
Ad neb nins sẽn kẽng a Davɩɩd nengẽ Siklaage, wakat ning yẽnda sẽn zoet n na n põs a Kiis biig a Sayullã. Nin-bãmb rag n yaa gãndaad nins sẽn sõng a Davɩɩd zabrã wakatã sʋk neb kẽere.
2
Bãmb dag n yaa tãb-tãoodba, la b tõe n loba kug ne b goabgã la rɩtgã ne loaabga, la b tõe n tãoo pɛɛm ne b tãbdã: nin-bãmb yaa Benzame buudã neb n be a Sayull ba-biisã sʋka.
3
B naabã yaa a Ayiyezɛɛre, sẽn pʋgd yaa Gibeya tẽng rao a Sema biig a Zoaase, a Azmavɛt kom-dibli a Yeyiyɛll ne a Yahaziyɛlle, a Beraka, Anatot rao a Zehu,
4
Gabawõ rao a Yismaya sẽn yaa gãndaoog neb pis-tã wã sʋk la b taoor soabã,
5
a Zeremi, a Yahaziyɛlle, a Yohanan, la Gedeera rao a Yozabaade,
6
a Eluzayi, a Yerimote, a Beyaliya, a Semariya, Aruf rao a Sefatiya,
7
Koore buudã neb a Ɛlkana, a Yisiya, a Azareyɛlle, a Yoyezɛɛre, n paas a Yasobeyam,
8
la Gedoor dao a Yeroham kom-dibli a Yoeela ne a Zebadiya.
9
Gãndaad n yi Gaad buudã sʋk n kẽng a Davɩɩd nengẽ we-raoogã pẽgsẽ. Yaa tãb-biis sẽn zãms zabre, n tar gãnd la kãna. Bãmb dag n yaa nin-toos wa gɩgma, la b tõe n zoee wa yãgs sẽn be tãmsã zutu.
10
B naabã yʋʋr la a Ezɛɛre, yiibẽ soab yaa a Abdyaase, tãabẽ soab yaa a Eliyaabe,
11
naasẽ soab yaa a Mismana, nu soab yaa a Zeremi,
12
yoobẽ soab yaa a Atayi, yopoe soab a yaa a Eliyɛlle,
13
nii soab yaa a Yohanan, wɛ soab yaa a Ɛlzabaade,
14
piig soab yaa a Zeremi, tɩ piig la a ye soab yaa a Makbanayi.
15
Bãmb dag n yaa a Gaad yagense, n yaa tãb-biis nanambse. B yao-zʋʋgã a yembr bal pãngã taa tãb-biis koabg pãnga, tɩ kãsmã pãng ta tãb-biis tusr nanambse.
16
Yaa bãmb n dʋʋg Zʋrdẽ kʋɩlgã pipi kiuugã, wakat ning kʋɩlgã sẽn dag n pid n puugdẽ wã, n kɩt tɩ neb nins sẽn dag n be tãn-londẽ wã fãa zoe n kẽng yaang la nin-taoorã.
17
Benzame buudã ne Zʋʋda buudã neb me kẽnga a Davɩɩd nengẽ tãmsã pẽgsẽ.
18
La a Davɩɩd yi n sega bãmb n yeel-b yaa: Yãmb sã n wata mam nengẽ ne bãan n na n sõng maam, mam deegda yãmb ne sũ-noogo. La sã n yaa sẽn na n belg maam n sõng m bɛɛbã tɩ m yaool n ka beege, bɩ tõnd yaab-rãmbã Wẽnnaam ges n kao bʋʋdã!
19
Wakat-kãnga, Wẽnnaam Sɩɩgã pida a Amasayi sẽn yaa tãb-biis pis-tã naabã t'a zẽk a koɛɛg n yeele: A Izayi biig a Davɩɩde, Bɩ vɩ-bãan zĩnd ne foom, Bɩ vɩ-bãan zĩnd ned ning sẽn fãagd-a foomã zugu! Bala, fo Wẽnnaamã fãaga foom! Dẽ, a Davɩɩd deega bãmb n kɩt tɩ b lebg a tãb-biisã nanambse.
20
Wakat ning a Davɩɩd sẽn wa n na n zab ne a Sayull la ne Filistẽ-dãmbã, Manaase neb n wa n sõng a Davɩɩd nebã. La a Davɩɩd ne a nebã ka tõog n sõng Filistẽ-dãmbã ye. Bala, Filistẽ-dãmbã nanambs zemsa taab n dig bãmb n yeele: A Davɩɩd dat n belga tõnd n yõk n kõ a soaal a Sayulli.
21
Ad neb nins sẽn tũ a Davɩɩd n leb Siklaagã: yaa a Adna, a Yozabaade, a Yediyayɛlle, a Misɛlle, a Yozabaade, a Eliyu, n paas a Siltayi. Bãmb yaa a Manaase buudã tãb-biis nanambse.
22
Bãmb sõnga a Davɩɩd tãb-biisã, bala, b rag n yaa gãndaado, la b lebga tãb-biisã nanambse.
23
Daar fãa, neb n dag n wat n sõngd a Davɩɩd tãb-biisã, hal tɩ tãb-biisã sõor wa lebg wʋsg wa Wẽnnaam tãb-biisi.
24
Ad neb nins sẽn dag n bob zab-teedã sõore. Bãmb wa a Davɩɩd nengẽ Ebrõ, n na n kɩt t'a led a Sayull zĩigẽ n lebg rĩmã, wa Sẽn-Ka-Saab sẽn dag n yeelã.
25
A Zuʋda yagensã sẽn dag n zãad gãn-bedrã ne kãndã sõor yaa tãb-biis tus a yoob la kobs-nii.
26
A Sɩmyõ yagensã, sẽn dag n yaa gãndaadã sõor yaa neb tus a yopoe la koabga.
27
A Leevi yagensã sõor yaa neb tus a naas la kobs-yoobe.
28
A Zoyiyaada sẽn yaa a Aarõ buudã naabã rag n tara neb tus a tã la kobs-yopoe.
29
Gãnda-poll a Sadok ne a buudã sõor yaa nanambs pisi la a yiibu.
30
A Benzame yagensã sẽn yaa a Sayull ba-biisã sõor yaa neb tus a tãabo. Bala, bãmb sʋkã neb wʋsg n dag n get a Sayull zakã tʋʋm yelle.
31
A Efrayiim yagensã sẽn yaa gãndaadã sõor yaa neb tus pisi la kobs-nii. Bãmb dag n yaa b buudã nin-kãsemse.
32
A Manaase buudã pʋɩ-sʋk pʋgẽ, yaa neb tus piig la a nii. Bãmb dag n yaa b buudã nin-kãsems b sẽn yãk tɩ b wa pʋdg a Davɩɩd zug rĩung kaam.
33
A Yisakaar yagens nins sẽn dag n mi wakatã, la b mi Israyɛll sẽn dag n tog n maan bũmb ningã sʋka, yaa tãb-biis nanambs kobessi, ne b ba-biisã b sẽn dag n so wã.
34
A Zabulõ yagensã sʋka, yaa raop tus pis-nu n dag n tõe n bob zab-teed n kẽng zabr zĩigẽ.
35
A Neftali yagensã sʋka, yaa tãb-biis nanambs tusri, n paas raop tus pis-tã la a yopoe sẽn dag n be ne bãmb n zãad gãn-bedrã ne kãndã.
36
A Dan yagensã sʋka, yaa neb tus pisi la a nii la kobs-yoob sẽn tõe n kẽng zabr zĩigẽ.
37
A Asɛɛr yagensã sʋka, yaa raop tus pis-naas sẽn tõe n bob zab-teed n kẽng zabr zĩigẽ.
38
Buud nins sẽn be Zʋrdẽ kʋɩlgã rʋʋndã, ne a Rubɛn la a Gaad ne a Manaase buudã pʋɩ-sʋkã sʋka, yaa raop tus koabg la pisi sẽn tõe n bob zab-teed buud fãa, n kẽng zabr zĩigẽ.
39
Nin-bãmbã fãa sẽn tõe n bob zab-teed n kẽng zabr zĩigẽ wã waa Ebrõ ne yam a yembre, n na n pʋdg a Davɩɩd zug rĩung kaam t'a lebg Israyɛll soolmã fãa rĩmã. La yɩɩ ne yam a yembr la Israyɛll neb a taabã fãa pʋdg a Davɩɩd zug rĩung kaam t'a lebg rĩmã.
40
Bãmb zĩnda Ebrõ ne a Davɩɩd rasem a tãabo, n dɩtẽ la b yũuda, bala b ba-biisã rag n segla rɩɩb bãmb yĩnga.
41
La baa neb nins sẽn dag n pẽ ne bãmb n be Isakaar ne Zabulõ la Neftali wã, rag n zɩlgda rɩɩb ne bõens la yʋgma, la ne bõn-wees ne niigi, n wat n kõt bãmba: rag n yaa rɩɩbo, zom, bur-maasa, kankam-koeem-gila, reezẽ-koeem-gila, reezẽ rãam, kaam, rũm-bɛd la rũm-bãooneg wʋsgo, bala, Israyɛll tẽngã gill rag n maanda sũ-noogo.
Mossi MPBU 2014
Moore Bible Bible Society of Burkina Faso, 2014
:
Save Notes