Nchamba iu ciaarî cia mwîrîga jwa Benjamini o ta Saûlû. Baatumagîra njara ya ûmotho o ta ya ûrîo rîrîa baarathaga mîgwî kana bakîgera maiga na gîkûtha.
Barîa batongeeretie nî Ahiezeri na Joashi bo baîrî baarî ataana ba Shemaa kuuma Gibea. Asikarî bangî ba gîkundi kîu baarî: Jezieli na Peleti ataana ba Azimavethi. Ningî nî kwaarî na Beraka na Jehu wa kuuma Anathothi,
Ishimaia kuuma Gibeoni ûrîa waarî ûmwe wa nchamba irîa mîrongo îthatû na aarî mûtongeeria waacio, na Jeremia na Jahazieli na Johanani na Jozabadi wa kuuma Gedera
Kuuma mwîrîgeene jwa Gadi nî kwaarî na nchamba cia ndwaa irîa ciaang'eenti mono na ciaaijî kûrwaa îgîtumagîra rong'o na matumo. Moothiû jaao joonanagia barî na ûchamba ta bwa ngatûnyi na baarî rwîro mono ta nkûrûngû. Bo nî beetîre kîrî Daudi kûrîa aarî giitiiroone rwanda.
Daudi areeta kûbathagana arabooria atîrî, “Bûkëethîrwa bwîjîte kîrî ni ta acoore nîkenda bûnteetheeria, ngaatuma ûcoore naabuî. Îndî bûkëeja kwîthîrwa bwîjîte nîkenda bûnkunyanîra kîrî anthû baakwa na gûtî u ni nthithîtie bûbûûî, Mûrungu wa biûjûjû bieetû akamenya mantû jau na abûkanûkie.”
Daudi eetîte Zikilagi nî aagwatîrwe mbaru nî asikarî ba mwîrîga jwa Manase na bareetania na Daudi Zikilagi. Nabo nî Adinaha na Jozabadi na Jediaeli na Mikaeli na Jozabadi na Elihu na Zilethai. Bau baarî atongeeria ba Asikarî ngiri inyingî kûu mwîrîgeene jwa Manase.
Iji nîcio ntari cia ikundi bia asikarî birîa bieetîre kîrî Daudi kûu Heburoni nîkenda bamûteetheeria aa mûnene antûûne a Saûlû o ta ûrîa MWATHANI aaugîîte.
Antû bangî ba Israeli baaumîte mîîrîgeene ya kûraaja, tayo Isakari na Zebuloni na Nafutali, nî beetîre kîrî Daudi bamwikîrîîtie irio, biaakamati nî mbarathi na nkamîîra na nyûmbû na ndeegwa. Irio biu biaarî bia mîthemba îmiingî. Nabio biaarî mûtu, mîgaate, îthithîtue na nchiara cia nkûû, na imaanja bia nzabibû injûmo na ndibei na maguta na ndeegwa na ntûrûme. Baathithîrie ûu nîkwîthîrwa Aisraeli nî baagwîrîîtue mono.