Ida Sang Prabu Daud ngwangun puri pabuat ragan idane ngraga ring Kota Daud. Ida taler nyawisang genah buat linggih Peti Prajanjian Ida Sang Hyang Widi Wasa, tur genahe punika kakereb antuk kemah.
Ida raris ngandika sapuniki: “Tuah wong Lewi dogen ane kalugra negen Peti Prajanjiane ento, sawireh tuah ia ane kapilih baan Ida Sang Hyang Widi Wasa buat negen Peti Prajanjiane ento tur ngancangin Ida salawas-lawasne.”
Irika Ida Sang Prabu Daud raris nauhin rakyat Israele sami mangda rauh ka Yerusalem buat jaga ngingsirang Peti Prajanjiane punika ka genah sane sampun cawisang ida.
Ida Sang Prabu Daud nauhin Sang Pandita Sadok miwah Pandita Abyatar kasarengin antuk wong Lewi nem diri, minakadinipun Dane Uriel, Asaya, Yoel, Semaya, Eliel miwah Dane Aminadab.
Ida Sang Prabu Daud raris mabaos ring wong Lewi punika sapuniki: “Nah nyama ene dadi pamimpin palingsehan suku Lewine. Suciangja dewek nyamane muah wong Lewi ane bareng-bareng teken nyama, apanga nyama prasida ngaba Peti Prajanjian Ida Sang Hyang Widi Wasa, Widin wong Israele ka tongose ane suba sediaang tiang.
Ida Sang Prabu raris mrentahang pamimpin-pamimpin wong Lewine mangda nyelik makudang-kudang wong Lewi buat makidung muah nyuarayang tetabuhan sane ngliangin minakadinipun, kecapi miwah cengceng.
Saking palingsehan juru kidunge kaselik makudang-kudang anak buat nyuarayang cengceng prunggu minakadinipun: Dane Heman okan Dane Yoel, pasemetonan danene sane mapesengan Asap okan Dane Berekia miwah Dane Etan okan Dane Kusaya, saking palingsehan Dane Merari. Buat nyarengin juru kidunge punika nyuarayang rebab sane masuara jangih, kaselik makudang-kudang wong Lewi inggih punika: Dane Sakaria, Yaasiel, Semiramot, Yehiel, Uni, Eliab, Maaseya miwah Dane Benaya. Buat nyuarayang rebab sane agung suarannyane, kaselik makudang-kudang wong Lewi inggih punika: Dane Matica, Elipele, Miknea, Asasya miwah pajagaan Perhyangan Agunge kekalih inggih punika Dane Obed-Edom miwah Yeiel.
Dane Berekia miwah Dane Elkana kasarengin antuk Dane Obed-Edom miwah Dane Yehia, kaselik dados pajagaan Peti Prajanjiane. Sang Pandita Sebanya, Pandita Yosapat, Pandita Netaneel, Pandita Amasai, Pandita Sakaria, Pandita Benaya miwah Pandita Elieser, kaselik dados juru ngupin trompet ring ajeng Peti Prajanjiane.
Irika Ida Sang Prabu Daud kairing antuk parapamimpin wong Israele, ping kalih parakomandan wadua balane lunga ka jeron Dane Obed-Edom buat ngambil Peti Prajanjiane, tur ida ngwentenang rerainan sane ageng.
Ida ngaturang banteng jagiran pepitu, miwah biri-biri pepitu ring ayun Ida Sang Hyang Widi Wasa, buat majatiang mungguing Ida Sang Hyang Widi Wasa jaga ngiangin wong Lewine sane negen Peti Prajanjiane punika.
Ida Sang Prabu Daud mabusana jubah kain lenen sane pinih becik, kadi asapunika taler juru tabuhe miwah Dane Kenanya pamimpinnyane makamiwah parawong Lewine sane negen Peti Prajanjiane. Ida Sang Prabu Daud taler nganggen kawaca epod.
Ritatkala Peti Prajanjiane punika ngranjing ring kota, Ida Mikal, okan Ida Sang Prabu Saul sane istri, macingakan saking jendelane. Irika cingak ida, Ida Sang Prabu Daud sedek masolah sinambi kecag-kecog kabatek antuk ledang kayun idane. Ida Mikal rumasa seneb nyingak Ida Sang Prabu Daud kadi asapunika.