Ki leenji icheek, “Oo kandoigap kooriigap kwanisyek che po Lawiik. Otiliilgei okweek ak tupchosyekwok si oibu moingetap Kamuktaindet ne Toroor, Kamuktaindetap Israel, kotogos konyo komosta ne koachopchi.
Amu ki ma oip okweek yuginye, kobar anyun Kamuktaindet ne Toroor, Kamuktaindennyo, chiito eng' acheek amu ki ma ki cheeng' ineendet ko uu ye ki king'at.”
Ki ip lagogap Lawiik moingetap Kamuktaindet eng' tigigoikwak eng' keetiik che ki ibe, ko uu ye kiga ng'at Musa ko uu ng'olyootap Kamuktaindet ne Toroor.
Ki mwachi Daudi che eecheen che po Lawiik kolewen tupchosyekwak tyeniik, ak tuguuk che kibutei, che chooto ko kibugandinik, ketubosyek sanisyek che po sugunonik che kibirei kebut kocheiyo miising', ak kotyenso eng' kagasetapkei.
Ki kuut iryagook eng' taitap moingetap Kamuktaindet tisiik: Sebania, Josapat, Nethanel, Amashai, Zekariah, Benaiah ak Elieser. Ki riibiigap kurgeetap ole ki mi moinget Obed-edom ak Jeia.
Ki wo anyun Daudi kobooto poisyegap Israel ak kiptainik che ki pou eliphuusyek, koba koip eng' kagasetapkei moingetap arorutyetap Kamuktaindet ne Toroor kotogos eng' kootap Obed-edom.
Ki ilaachi Daudi ngoryeet ne po katanit ne karaaran, kobooto Lawiik tugul che ki ibei moinget, ak tyeniik, ak Kenania kandoindetap tyeniik. Ki ilaachi kora Daudi ephod ne po katanit.
Koip anyun `Israel tugul moingetap arorutyetap Kamuktaindet ne Toroor kotogos kogasanugei eng' tuugeet ne oo, ak koguutonu iryagook, ak kobironu sanisyek che po sugunonik, ak kobutonu kibugandinik ak ketubosyek.
Kingo it `moingetap arorutyetap Kamuktaindet ne Toroor nganaseetap Daudi, koiitito Mikal cheptap Saulo eng' tirisia, kogeer Daudi kourereni ak kogasigei; ki sas ineendet eng' muguleldanyi.