1
Ɛ jɛn cu Dee-bid rɔ lät kä duel därwec Dee-bid. Kä cuɛ kɛmɛ yiath piny kɛ kui̱ thandukä matdä ruac Kuɔth.
2
Kä cu Dee-bid wee i̱, “Thilɛ raan ɛ ni raan Lii-bay ɛnɔ bi thanduk matdä ruac Kuɔth kapɔ, kɛ ɣöö ci Kuoth Nhial kɛ mɛk kɛ ɣöö ba thanduk matda ruacdɛ kap kä bikɛ jɛ lät ikä amäni cäŋ kɛl.”
3
Kä cuɛ ji̱ I-thɛ-rɛl diaal dol kä Jɛ-ru-tha-lɛm, kɛ ɣöö ba thanduk matdä ruac Kuɔth nööŋ gua̱thdɛ min cɛ la̱t.
4
Kä cuɛ gaat Ä-ron kɛnɛ ji̱ Lii-bay dol kɛɛl.
5
Kä gaat Kɛ-ɣath. Cua bo̱o̱th ni U-ri-el kɛnɛ ji̱ maarädɛ ti kuɔ̱r wi̱cdɛ jiɛn da̱ŋ rɛw.
6
Kä gaat Mɛ-ra-ri. Cua bo̱o̱th ni Ä-tha-yaa kɛnɛ ji̱ maarädɛ ti kur rɛw wi̱cdɛ jiɛn da̱ŋ rɛw.
7
Kä gaat Ger-com. Cua bo̱o̱th ni Yo-el kɛnɛ ji̱ maarädɛ ti kuɔ̱r wi̱cdɛ jiɛn da̱ŋ diɔ̱k.
8
Kä gaat Ɛli-dha-pan. Cua bo̱o̱th ni Cɛ-mɛ̈-yaa kɛnɛ ji̱ maarädɛ ti kur rɛw.
9
Kä gaat Ɣɛb-ron. Cua bo̱o̱th ni Ɛ-li-el kɛnɛ ji̱ maarädɛ ti jiɛɛn bädäk.
10
Kä gaat U-dhi-el. Cua bo̱o̱th ni A-mi-na-dab kɛnɛ ji̱ maarädɛ ti kuɔ̱r kɛl wi̱cdɛ nɛy da̱ŋ wäl rɛw.
11
Ɛ jɛn cu Dee-bid bööth palä ni Dha-dok kɛnɛ Ɛb-ya-thar kɛ ji̱ Lii-bay ni U-ri-el kɛnɛ Ä-tha-yaa kɛ Yo-el kɛnɛ Cɛ-mɛ̈-yaa kɛ Ɛ-li-el kɛnɛ A-mi-na-dab cɔl.
12
Kä cuɛ kɛ jiök i̱, “Kɛ yɛn bööth thuk duëli ji̱ Lii-bay. Lɛ̈yɛ rɔ̱ kɛ gaatmanikun, kɛ ɣöö bia thanduk matdä ruac Kuɔth Nhial min la Kuoth I-thɛ-rɛl wä nööŋ guäth ɛ ca la̱t kɛ kui̱dɛ mi.
13
Kɛ ɣöö /ken yɛnɛ wä nööŋ ɛ yɛn kɛ nhiam yɛn ji̱ Lii-bay, ɛ jɛn ci Kuoth Nhial min la Kuothdan gaak kɛ kɔnɔ.”
14
Inɔ cu bööth palä kɛ ji̱ Lii-bay rɔ lɛy, kɛ ɣöö ba thanduk matdä ruac Kuɔth Nhial Kuoth I-thɛ-rɛl wä nööŋ.
15
Kä cu ji̱ Lii-bay thanduk matdä ruac Kuɔth kap kɛ jiɛɛn kɛ wuɔ̱ɔ̱kiɛn. Ce̱tnikɛ ruac Kuɔth Nhial mëë ci Muthɛ jɛ lar.
16
Kä cu Muthɛ bööth ji̱ Lii-bay lɛni jiök kɛ ɣöö ba naath ti bia̱ këët din kuany kä gaatmani, ti bi diit puɔ̱nydä kɛt kɛ thuɔmni.
17
Kä cu ji̱ Lii-bay Ɣe-man gat Yo-el kɛnɛ A-thap gat Bɛ-rɛk-yaa kä gaat Mɛ-ra-ri kɛ E-than gat Ku-ca-yaa kuany.
18
Kä cu lua̱a̱kiɛn a Dhɛ-kar-yaa kɛnɛ Ya-dhel kɛ Cɛ-mi-ra-moth kɛnɛ Yɛ-ɣi-el kɛ Uni kɛnɛ Ɛli-ab kɛ Bɛ-na-yaa kɛnɛ Mä-the-yaa kɛ Mɛ̈-tith-yaa kɛnɛ Ɛ-li-pɛ-le-ɣu kɛ Mik-ne-yaa kɛ gääŋ thuɔk rɛ̈ɛ̈k ni O-bed-ɛ-dom kɛnɛ Yi-el.
19
Kä cu këët din a Ɣe-man kɛnɛ A-thap kɛ E-than, pua̱a̱t thuɔmni yieethä min yian.
20
Kä cu Dhɛ-kar-yaa Ä-dhi-el kɛ Cɛ-mi-ra-moth kɛnɛ Yɛ-ɣi-el kɛ Uni kɛnɛ Ɛli-ab kɛ Mä-the-yaa kɛnɛ Bɛ-na-yaa la pua̱a̱t bä.
21
Kä cu Mɛ̈-tith-yaa kɛnɛ Ɛ-li-pɛ-le-ɣu kɛ Mik-ne-yaa kɛnɛ O-bed-ɛ-dom kɛ Yi-el kɛ Ä-dhɛ̈dh-yaa a pua̱a̱t thuɔmni bä.
22
Kä cua Kɛ-nan-yaa kuany ala bo̱o̱th ji̱ Lii-bay tin pua̱tkɛ thuɔmni, kɛ ɣöö ŋäcɛ puɔ̱t thuɔm agɔaa.
23
Kä cu Bɛ-rɛk-yaa kɛnɛ Ɛl-ka-na a ga̱a̱ŋ thuɔk duëël thandukä matdä ruac.
24
Kä cu Cɛ-bɛ̈n-yaa kɛnɛ Yo-ca-pat kɛ Nɛ-tan-el kɛnɛ Ä-ma-thay kɛ Dhɛ-kar-yaa kɛnɛ Bɛ-na-yaa kɛ Ɛ-li-dhɛr bo̱o̱th palä a kuɔ̱ɔ̱th kaaŋä nhiam thandukä matdä ruac Kuɔth. Kä O-bed-ɛ-dom kɛnɛ Yɛ-ɣi-yaa a ga̱a̱ŋ thuɔk duëël thandukä matdä ruac bä.
25
Ɛ jɛn cu Dee-bid kɛnɛ bööth I-thɛ-rɛl kɛ bööth bathdɔɔri wä wa thanduk matdä ruac Kuɔth Nhial nööŋ dhɔr O-bed-ɛ-dom kɛ tɛ̈th lɔaac mi di̱i̱t.
26
Kä kɛ ɣöö ci Kuoth ji̱ Lii-bay tëë kapkɛ thanduk matdä ruac Kuɔth Nhial luäk, cukɛ thääk bärɔw kɛnɛ rueeth rɔɔmni da̱ŋ bärɔw thöp ala muc.
27
Kä cu Dee-bid kɛnɛ ji̱ Lii-bay tin kapkɛ thanduk matdä ruac tekɛ bieyni ti gɔw, kä cu ji̱ Lii-bay tin këët din kɛ Kɛ-nan-yaa bo̱o̱th pua̱a̱t thuɔmni këët din cu Dee-bid bieyni kath la̱th.
28
Inɔ cu ji̱ I-thɛ-rɛl diaal thanduk matdä ruac Kuɔth Nhial nööŋ kɛ diit kɛnɛ buɔ̱l kɛ kaaŋ kɛ ŋar mi di̱i̱t.
29
Kä min ci thanduk matdä ruac Kuɔth Nhial cop däärwec Dee-bid, cu nya Thɔɔl ni Mi-kal guic kɛ wernyin, cuɛ kuäär ni Dee-bid nɛn duthɛ kä tɛth lɔcdɛ. Kä cuɛ jɛ lat jɔ̱ɔ̱r kɛ rɛy lɔaacdɛ.
Nuer Bible 1998
Nuer Bible Bible Society in South Sudan 1998, 2012