×

Ika Bible 2018

1 Ihiẹn Mẹni 16

1
Ogẹn wẹ gi bulụa Ẹkpẹti Chuku imẹ Obodo Defidi rị Jerusalẹm, wẹ nọ bu ẹ che imẹ ọdụ hụn Defidi mẹmẹn'ẹ. Wẹ nọ ihun ẹ chụnyeni Chuku ẹjan w'a dụn ọkụn lẹ hụn wẹ e rigbama.
2
Ogẹn Defidi gi chụngụ ẹjan ahụn w'a dụn ọkụn lẹ hụn wẹ e rigbama, ọ nọ gi ẹfan Osolobuẹ gọzi ndị Izrẹlụ ahụn gbakikomẹni.
3
Ọ nọ ye onyẹ Izrẹlụ ọwụlẹ ogbe brẹdi ohi-ohi ohu, ọkpụrụkpụ mkpụrụ osisi deti wẹ pịngbama kikọ ohu lẹ mkpụrụ osisi vaịnị wẹ pịngbama kikọ ohu.
4
Ọ nọ tumẹ ndị Livaị jẹnkọ d'a gha a nọdị ihun Ẹkpẹti Osolobuẹ a rụn ọrụn, a rịọ Osolobuẹ, e ye ẹ ekele, a ja Osolobuẹ wụ Chuku Izrẹlụ mma:
5
ndịnị k'o tumẹ: Asafụ wụ onyẹ-isi, Zẹkaraya wụ hụn a hansọnn'ẹ, o sọn Jẹyẹlụ, Shẹmiramọtụ, Jehiẹlụ, Matitịa, Ẹliabụ, Bẹnaya, Obẹdi-Ẹdọm lẹ Jẹyẹlụ. Wẹ k'a gha a kpọ ụbọ-layẹ lẹ ụbọ-hapụ. Asafụ nkẹ k'a gha a kụ kpajaị (simbalụ),
6
Bẹnaya lẹ Jahaziẹlụ hụn wụ ndị nchụn-ẹjan k'a gha e gbusọnmẹ opi o ru ogẹn opi ihun Ẹkpẹti Nkwerigbama Chuku.
7
Ụhụọhịn ahụn wụ nke ibuzọ Defidi ye Asafụ lẹ itu ẹ ẹbụ-ọma wẹ gi e ye Osolobuẹ ekele. Ọnwan wụ ẹbụ hụ:
8
Ye ni Osolobuẹ ekele! Jan'a mma! Mẹ ni ndị alị ile marịn ihiẹn ọ rụn.
9
Bụnịn'a ẹbụ; bụnịn'a ẹbụ ịja-mma; ku ni oku ọrụn-atụmẹnya ile ọ rụn.
10
Gi ni ẹfan-nsọ a nyan isi; obi ya sụọma ndị e fe Osolobuẹ ụsụọ.
11
A chọ nị Osolobuẹ lẹ ikẹn ẹ; a chọ nị ihun ẹ ogẹn ile.
12
Nyanhan nị ihiẹn ndị a tụ ẹnya o mẹ, ọrụn atụmẹnya a lẹ ihiẹn o gi hangbu ndị-iṅẹnrẹn ẹ eṅẹn.
13
Mẹn'ẹ, ụmụ odibo ẹ Izrẹlụ; mẹn'ẹ, ụmụ Jekọpụ ndị ọ họrị.
14
Ịya wụ Osolobuẹ, Chuku ẹnyi; ịya a hannị ụwa ile eṅẹn.
15
Ọ nyanhansọnmẹ nkwa o kwe, ihiẹn hụn ọ sị o k'e mẹ; ọ nyanhansọnmẹ ẹ agbọ nnụ ole-lẹ-ole;
16
nkwa hụ o gi kwọngbama ya lẹ Ebraham, nkwa hụ o kwe Aziki, kunn'ẹ enwẹn ẹ.
17
O gi ẹ tini Jekọpụ iwu, gi ẹ tumẹni Izrẹlụ nkwerigbama itẹbitẹ:
18
sị, “M k'e ye i alị Kenaanị nọ wụrụ ukuu i.”
19
Kẹ wẹ kelẹni bu ọda, kẹ wẹ kelẹni bu ọda kaka, kẹ wẹ wụ abịamabịa imẹ Kenaanị nwẹn,
20
wẹ hụ a wahunmẹ — a gha alị a washi alị, a gha alị-eze a washi alị-eze.
21
Ọ nịnị onyẹ ọwụlẹ bịangbu wẹ; o gisọnmẹ ufiri wẹ jụgbọ ndị-nze:
22
a sị, “Emẹtụkwọlẹ ni ndị m tumẹ ẹka; emẹkwọlẹ ni ndị-amụma m eje-ihiẹn.”
23
Ụwa ile, bụnị nị Osolobuẹ ẹbụ; e ku ni oku nzụọpụha a ụhụọhịn-ụhụọhịn.
24
Gwa nị alị ichẹn-ichẹn oku ọghọ a, gwa nị ndị alị ile ihiẹn rịgbu enwẹn ẹ mma o mẹsọnmẹ.
25
Makẹni Osolobuẹ e hikẹ ogbe, o furukẹ onyẹ w'a ja mma; ịya furu w'a tụ egun ẹ, ẹlẹ mmọn-lẹ-iyi.
26
Makẹni mmọn-lẹ-iyi ile alị ndị ọzọ e fe wụhụ ihiẹn ẹka mẹmẹ, kanị Osolobuẹ mẹmẹ elu-igwere.
27
Ọghọ lẹ ikpẹn rịsọnmẹ ebe ọ rị; ebe ọ rị kẹ ikẹn lẹ anwịnrịn rị.
28
Ye ni Osolobuẹ ọghọ a, ikpụlọ ile rị alị ichẹn-ichẹn; ku n'ẹ nị ọghọ lẹ ikẹn wụ nke Osolobuẹ;
29
ye ni Osolobuẹ ọghọ hụn furu ẹfan a. Weri ni oyiye bịa ihun ẹ; fe ni Osolobuẹ ofufe rị nsọ.
30
Elu-ụwa ile, tụkwọ nị egun ẹ! O mẹgụọ ụwa turu, o mẹhunmẹkọ.
31
Elu-igwere ya ghọghọma; ẹfọ ya sụọma elu-ụwa ụsụọ; wẹ ku ẹ alị ile nị “Osolobuẹ rị a kị!”
32
Ohimin ya zụn ụzụn — ohimin lẹ ihiẹn ile rịn'a; ugbo ya ghọghọma — ya lẹ ihiẹn ile rịn'a!
33
Ogẹn ahụn, osisi ndị rị ẹgboko k'a bụma ẹbụ, a bụma wẹ ẹbụ-ịghọghọ ihun Osolobuẹ, makẹni ọ lala d'e kin ụwa ikpe.
34
Ye ni Osolobuẹ ekele makẹni ọ rịka mma; ihiẹn-ọsụsụọ a rị jẹnrin ejẹn.
35
Yi ni oro sị, “Dodo zụọpụha ẹnyi, Chuku Onyẹ nzụọpụha ẹnyi; welụa ẹnyi ụlọ, gbapụha ẹnyi ẹka alị ndị ọzọ, nị ẹnyi hụn ụzọ kpanmịn ẹfan nsọ ị, nị ẹnyi ja ị mma, gi i nyan isi.”
36
Ọjịja-mma ya rịnị Osolobuẹ, Chuku Izrẹlụ jẹnrin ejẹn!! Ya ndị Izrẹlụ ile zu ebẹhụ nọ sị, “Isẹẹ!!” Ya wẹ nọ ja Osolobuẹ mma!!
37
Defidi nọ bu Asafụ lẹ itu ẹ tọ ihun Ẹkpẹti Nkwerigbama Osolobuẹ, nị w'a nọ ebẹhụ a rụn, ụhụọhịn ọwụlẹ lẹ ọrụn w'a rụn ụhụọhịn hụ.
38
Kẹ Obẹdi-Ẹdọm kẹ ibe wẹ ndị Livaị ẹsatọ kwasị ọgụn ẹtọ rị ndị o butọ ebẹhụ nị wẹ hụn ụzọ e sọn wẹ a rụn ọrụn. Nwa Jedutunu wụ Obẹdi-Ẹdọm lẹzi Hosa wụ ndị e che nche ebe Ẹkpẹti hụ rị.
39
Defidi a latọzịghọ onyẹ nchụn-ẹjan wụ Zadọkụ lẹ ndị nchụn-ẹjan ibe ẹ nị w'a rụn ọrụn ihun Ọdụ Osolobuẹ ebẹhụ jẹn elu wẹ nọ e fe ofufe imẹ Gibiọnụ,
40
nị w'a nọ elu ukpo wẹ nọ a dụn ẹjan ọkụn a chụnyeni Osolobuẹ ẹjan w'a dụn ọkụn ogẹn ile, ụtụntụn lẹ ẹnyasị, k'o dọnchanrịn rị imẹ Iwu Osolobuẹ hụn Osolobuẹ ye Izrẹlụ.
41
Ndị ọ latọzị che ni wẹ wụ Hẹmanị lẹ Jedutunu lẹ ndị họdụnị wẹ kpọ ẹfan họrị nị wẹ e ye Osolobuẹ ekele, “makẹni ihiẹn-ọsụsụọ a rị jẹnrin ejẹn.”
42
Hẹmanị lẹ Jedutunu kẹ igbu-opi lẹ ịkụ-kpajaị (simbalụ) lẹ ịkpọ ihiẹn-egu ndị ọzọ wẹ gi a bụ ẹbụ rị nsọ rị ẹka. Ụmụ Jedutunu nwọn iche-nche.
43
Ya ịhịan ile nọ lama, onyẹ-onyẹ a lashi iwe ẹ, Defidi nkẹ a la iwe ẹ d'a gọzi ikpụlọ a.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes