Kane Daudi osechako dak e ode mane ogero, nowacho ni Nathan janabi niya, “Koro an adak e ot moger maber gi yiend sida, to Sandug Muma mar Ruoth Nyasaye nie hema.”
Kuonde duto mane awuothoe gi jo-Israel, ne ok apenjo achiel kuom jobura mane aketo mondo obed jokwadh joga Israel gimomiyo ok gigerona ot mar yiend sida.’
A Nyasaye, gima isetimona pod in ikwano ka gima tin, nimar bende isewacho ni dhooda nosik kuom ndalo mang’eny, kendo isenyisa kaka tienge mabiro nochal.
Ere oganda moro e piny, machalo gi jogi Israel? Bende nitie jopiny moro mane isedhi miwaro e tich wasumbni, miloko jogi? Isemiyo nyingi duong’ kuom timbe madongo kendo malich nikech iseriembo ogendini moko mondo owe thuolo ni jogi mane ireso kigolo e piny Misri.
Singruoknino mondo ogurre, kendo nyingi oyud duong’ nyaka chieng’, ka ji wacho niya, ‘Ruoth Nyasaye Manyalo Gik Moko Duto, ma Nyasach Israel en Nyasachgi adier!’ Kamano dhooda nodongi e nyimi.