A ye wotoro waa kelen (1 000) bɔsi a fɛ, ni sotigi waa wolonwula (7 000), ani sennatigi mɔgɔ waa mugan (20 000). A ye wotoro samaso kɛmɛ to yen, ka tɔ nunu bɛɛ senfasaw tigɛtigɛ.
A ye lasigidenw sigi Damasi mara la, Siri jamana na. O la, Sirikaw y'u yɛrɛ majigi Dawuda ye, ka nisɔngɔ sara a ye. Masaba tun be see di Dawuda ma a ka kɛlɛw bɛɛ la.
A ye zira caaman ta Adadezɛri ka duguba fila kɔnɔ, minw ye Tibati ni Kun ye. Solomani y'o le ta ka tasaba dilan, ani tutunanw, ni Alabatoso kɔnɔ minan dɔ wɛrɛw.
A y'a dencɛ Adoramu ci masacɛ Dawuda fɛ k'a fo, ani k'a waleɲuman lɔn Adadezɛri kɛlɛko la ka se a kɔrɔ, bari Towu ni Adadezɛri tun ye kɛlɛɲɔgɔnw ye. Adoramu tagara ni minanw sifa bɛɛ ye minw dilanna ni sanu ye, ni warigwɛ, ani zira ye.
Masacɛ Dawuda y'u di Masaba ma i n'a fɔ a tun ye warigwɛ ni sanu d'a ma cogo min na, a tun ye minw bɔsi siya nunu bɛɛ fɛ: edɔmuw, ni mowabuw, ani amoniw, ni filisiw ani amalɛkiw.