Nyau kelama udah bekau nya, Raja David nyerang orang Pilistin baru, lalu ngalahka sida. Iya ngerampas nengeri Gat enggau genturung pendiau ti ngelingi nengeri nya ari jari sida.
Udah nya, David nyerang Raja Hadadeser sitak menua Sobah di menua Siria, semak menua Hamat, laban Hadadeser udah nguji ngerampas perintah di menua ti ngimbai ulu Sungai Eupratis.
David lalu ngerampas seribu buah kerita perang Hadadeser, tujuh ribu iku soldadu ke nepan kuda, enggau dua puluh ribu iku soldadu ke bejalai kaki. David ninggalka kuda semina chukup dikena seratus buah kerita perang, tang mutuska rakat semua kuda ti bukai.
Udah nya iya lalu nirika kem soldadu di menua sida, lalu orang Siria nyadi nembiak iya, lalu mayar chukai ngagai iya. TUHAN ngasuh David menang di semua endur.
Iya mega ngambi mayuh amat perengka temaga ari Tibhat enggau ari Kun, iya nya dua buah nengeri ti dipegai Hadadeser. (Udah bekau nya, Solomon ngena temaga nya begagaka tangki, berapa iti batang tiang ti besai, enggau perengka temaga ti bukai ke Rumah Sembiang.)
iya lalu ngasuh anak iya Joram meri tabi basa enggau jaku puji ngagai David ketegal iya udah ngalahka Hadadeser, ke suah udah dilaban Tou. Joram mai ngagai David pemeri ti digaga ari emas, pirak enggau temaga.
Raja David lalu nyerahka semua utai nya ngagai TUHAN, sama enggau pirak enggau emas ti udah diambi iya ari semua bansa ti udah dialahka iya, iya nya bansa Edom, Moap, Amon, Pilistin, enggau bansa Amalek.