×

Ika Bible 2018

1 Ihiẹn Mẹni 22

1
Ya Defidi nọ sị, “Ebeni Osolobuẹ nọ za oku kẹ ụlọ Osolobuẹ wụ Chuku k'a rị, ịya lẹ ukpo ndị Izrẹlụ a nọ a dụn ẹjan ọkụn.”
2
Defidi nọ sị wẹ kpọgbama abịamabịa ile bi imẹ Izrẹlụ, ọ nọ gha imẹ wẹ họpụha ndị jẹnkọ d'e be ọmụma, nị wẹ hụn ụzọ kwademẹ ọmụma w'e gi tụn Ụlọ Chuku.
3
Ọ nọ wẹhẹ igwe ọda-ọda, wẹ k'e gi mẹmẹ ntu w'e gi rụn ẹhue rịsọnmẹn'ẹ, mẹmẹzikwọ akpa ichẹn-ichẹn; o butọzịghọ igwe-bronzu wẹ salẹni ẹka ma.
4
O wẹhẹzi ogwe osisi sida wẹ salẹni ẹka gụn, makẹni ndị Sidọnụ lẹ ndị Taya buhẹn'ẹ ya ọda-ọda.
5
Defidi sị, “Solomọnụ nwa m wụhụ nwata, o ke nwọn ihiẹn ọ marịn, bụ ụlọ wẹ k'a tụnnị Osolobuẹ jẹnkọ d'a wụ ụlọ ma mma ọda-ọda, ụlọ wẹ k'a nụ ukwere ẹ, ụlọ k'e nwọn ọghọ ẹnya ndị alị ile rị ichẹn-ichẹn. M sikọ d'a kwademẹ nwan ihiẹn wẹ k'e gi rụn a.” Ya Defidi nọ kwademẹ ihiẹn ọda-ọda n'o d'a nwụn, butọ nị w'e gi rụn ụlọ ahụn.
6
Ọ nọ kpọ Solomọnụ nwa a, sị a hụnkwọ a n'ọ tụn nị Osolobuẹ wụ Chuku Izrẹlụ Ụlọ-nsọ.
7
Defidi sị Solomọnụ, “Nwa m, m te bu ẹ obi nị m k'a tụn Ụlọ-nsọ gi ye Ẹfan Osolobuẹ wụ Chuku m ọghọ.
8
Kanị Osolobuẹ nọ sị m, ‘Y'e gbugụọ ndị bu ọda, lụ agha bu ọda. Y'a tụnkọ Ụlọ-nsọ hụ w'e gi ye ẹfan m ọghọ, makẹni ndị i gbu elu-ụwa e bukẹ ọda ẹnya m.
9
Kama, ị k'a mụ okẹnnyẹ, hụn k'e mẹ onyẹ udọn. M k'e mẹ ndị-iṅẹnrẹn ẹ ile rị azụụn ọwụlẹ yen'ẹ efe. Ẹfan a k'a wụ Solomọnụ hụn wụ “Udọn”. M k'e ye Izrẹlụ udọn ogẹn ẹ, mẹ Izrẹlụ mẹ jụụ.
10
Ịya wụ onyẹ hụn k'a tụn Ụlọ-nsọ jẹnkọ d'a za ẹfan m. O k'a wụ nwa m, mmẹ nwẹn k'a wụ nẹdi ẹ. M k'e mẹ ukpo-eze ẹ turu, eze ẹ agụkọ imẹ Izrẹlụ.’
11
“Nwa m, Osolobuẹ ya nọyen'i nwan; y'a rịn'ị mma, n'ị tụn ụlọ Osolobuẹ wụ Chuku k'o dọn ku ẹ ni ịyụ nwọn tụn a.
12
Osolobuẹ ya ye i uche lẹ nghọta ogẹn o k'e gi tumẹ i onyẹ-isi Izrẹlụ, n'i hụn ụzọ dọnmẹ iwu Osolobuẹ wụ Chuku i.
13
Ya kẹ ihiẹn e gi ghan'ị — omẹkwọ nị y'e dọnringhọ ẹnya sọnchanrịn uhi lẹ iwu ile Osolobuẹ ye Mozizi ye Izrẹlụ. Kakẹnmẹ; rikin obi. Atụkwọlẹ egun mọbụ nị ndụn gụ ị.
14
“A lịlịmagụọ m butọ ẹkpa goru uku nnụ-uku ọgụn-isẹn (100,000), ẹkpa siliva uku ijẹri-uku lẹ igwe karị hụn w'a ma — kẹ igwe-bronzu kẹ igwe-mmaka, lẹzi akp'osisi lẹ ọmụma. I nwọn ikẹn buzi cheni wẹ.
15
Y'e nwọnghọ ndị ọrụn bu ọda: kẹ ndị e be ọmụma kẹ ndị e dọn ụlọ kẹ ndị a ma ụlọ, kẹ ndị nwọn ẹka-ọrụn ichẹn-ichẹn:
16
ndị ọrụn goru, ndị ọrụn siliva, ndị ọrụn igwe-bronzu lẹ ndị ọrụn igwe-mmaka. Bidọn nwan ọrụn ahụn. Osolobuẹ ya nọyen'i!”
17
Ya Defidi nọ sị ndị-isi ile rị Izrẹlụ wẹ yeni Solomọnụ nwa a ẹka.
18
Ọ sị wẹ, “Ẹlẹ Osolobuẹ wụ Chuku ụnụ nọyeni ọnụ anọyeni? O mẹgụọnị agha bini ụnụ azụụn ile? Makẹni o bugụọ ndị bi alị ile rị ẹgbẹrẹni che m ẹka; alịnị ile rị nwan okpuru Osolobuẹ lẹ ndị nke ẹ.
19
Gi ni nwan obi ụnụ ile lẹ umẹ-ndụn ụnụ ile femẹ Osolobuẹ wụ Chuku ụnụ. D'a tụnma nị nwan Ụlọ-nsọ Osolobuẹ wụ Chuku ụnụ, kẹni ụnụ hụn ụzọ buban Ẹkpẹti Nkwerigbama Osolobuẹ lẹ ihiẹn ile rị nsọ wẹ gi fe Chuku imẹ Ụlọ-nsọ hụn wẹ k'a tụn makẹ Ẹfan Osolobuẹ.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes