Amiram bidibisi n-daa nyɛ Aduna mini Musa. Ka bɛ daa pii Aduna min’ o bidibisi ni bɛ su jɛmbu duu puuni neen’ kasi la fukumsi sahakam, ka tuɣindi tulaale zim tiri Yawɛ, ka tumd’ o tuma, ka lan zaŋd’ o yuli suhiri alibarika niŋdi niriba ni sahakam.
Bɛ ni daa sabi Lɛvi bihi yuya n-doli shɛm m-bɔŋɔ: bɛ daa sabi li dolila bɛ yaannim’ dunoya mini bɛ dɔɣirikpamba ni bɛ ninvuɣ’ yinoyino bɛn daa paai yuun’ pisi zaŋ chana, ka ni tooi tum tuma Yawɛ jɛmbu duu maa ni.
Amaa bɛ tuma daa nyɛla bɛ sɔŋdi Aduna bidibisi Yawɛ jɛmbu duu maa tuma ni, ka maani di dundɔŋ mini di duri, ka paɣiri neen’ shɛŋa din be kasi la zaa, ka tumdi tuun’ shɛlikam din nyɛ Naawuni jɛmbu duu maa ni tuma.
Bɛna n-daa lan su sara maligu bɔrɔbɔro la mini bɛ ni daa yi zaŋdi zim shɛŋa na ti maani sara la ni bɔrɔbɔro parilambihi din ka dabindi la fukumsi. Bɛna n-daa lan su bɛ ni she binshɛŋa mini bɛ ni zaŋ kpam mali binshɛŋa n-zaŋna ti mali sara la zaa fukumsi. Bɛna n-daa lan su binyɛra galisim bee di yɛliŋ buɣisibu.
Ka saha shɛlikam bɛ yi ti zaŋ sara ni bɛ nyo buɣim ti Yawɛ vuhim dabisa dali bee gol’ paliga dabisa dali bee churi dabisa dali, bɛ zaanila Lɛvinim’ bɛn yɛn be Yawɛ tooni kalinli tariga ni nyɛ shɛm.
Bɛna n-daa su ni bɛ lihiri Yawɛ chirigibu shee suɣili la mini luɣ’ kasi shee maa, ka lan sɔŋdi bɛ mabihi bɛn daa nyɛ Aduna bidibisi la Yawɛ jɛmbu duu maa puuni tuma ni.