U ye Levi kɔmɔgɔ cɛdenw jati, k'a ta mɔgɔw ma minw sii sera saan bi saba ma, ani minw tɛmɛna o kan. U tun kɛra mɔgɔ waa bi saba ni waa seegi (38 000) ye.
mɔgɔ waa naani (4 000) ka kɛ daa kɔlɔsibagaw ye, mɔgɔ waa naani ka kɛ Masaba tandobagaw ye, n'u be to k'a tanu ni fɔlikɛminanw ye ale ye minw dilan o kama.
Amuramu deenw tun ye Arɔn ni Musa ye. Arɔn wolomana ka bila a daan na Ala ka yɔrɔ baara kama, Ale n'a kɔmɔgɔw ka to ka wusulan jɛni Masaba ye, k'a ka baara kɛ, ani ka to ka duba kɛ mɔgɔw ye Masaba tɔgɔ la tuma bɛɛ.
Olu le ye Levi kɔmɔgɔw ye, ka kɛɲɛ n'u ka gwasow ye, ani u ka gwatigiw. Ka kɛɲɛ ni jati ye min tun kɛra, u tun ye mɔgɔ kelen kelen bɛɛ tɔgɔ sɛbɛn. N'u tun ye saan mugan, walima mugan ni kɔ sɔrɔ tuma min na, u tun be Masaba ka soo kɔnɔ baara daminɛ.
U tun be Arɔn kɔmɔgɔw dɛmɛ baara la Masaba ka soo kɔnɔ, ka to ka luu kɔnɔnaw ni sodenninw kɔlɔsi, ka Ala ka minanw bɛɛ saniya, ani ka baara wɛrɛw kɛ o yɔrɔ la.
Buru minw tun be to ka bila Ala ɲakɔrɔ, u tun b'o baara kɛ, ani ka mugu koo ɲanabɔ min tun ye suman saraka ye: ŋɔmi, fununan ma don minw na, ni takula, ani furufuru. Olu fana le tun be sumanikɛminanw sifa bɛɛ kunna.
U tun b'o kɛ fana saraka jɛnitaw bɛɛ bɔtuma na Masaba ɲakɔrɔ, lafiɲɛlon na, ni kalokura ɲanagwɛ la, ani ɲanagwɛ dɔ wɛrɛw la. U tun be baara kɛ a ɲakɔrɔ tuma bɛɛ ka kɛɲɛ ni mɔgɔda ye min latigɛra.
U tun be Ɲɔgɔnkunbɛn fanibugu kɔlɔsi, ani Yɔrɔ Senuman. U tun be to ka Arɔn kɔmɔgɔw ka fɔtaw bato Masaba ka soo kɔnɔ baara la, olu minw ye u balimaw ye.