Werikab Amram ko ki: Aron, ak Musa: ak kigitaban Aron si kotaban inendet tuguk che tililen mising’, inendet ak werikyik, koigeny, si kobeelei nyamdutik eng’ taitab Jehovah, koboisiechi inendet, ak koberuris eng’ kainennyi koigeny.
Chuto ko ki werikab Lawi ko u gorikab kwanisiekwak, kandoikab gorikab kwanisiekab icheget che kigiit, kobee koitetab kainaik, ko kagiit chito agenge agenge, che kiyai boisietab otisietab gotab Jehovah, koboch che bo kenyisiek tiptem ak che siirei.
Amu ki boisienywa koboisiechi werikab Aron agobo boisietab gotab Jehovah, eng’ seremusiek, ak eng’ gorik che bo orit, ak eng’ kaanyinyetab tuguk tugul che tililen, boisietab otisietab gotab Kamuktaindet;
agobo makatinikab kabartaet agichek, ak busiek che tambulul che bo kagochinetab busiek, ngo che bo makatinik che ma kinde mermerek anan che kigelei eng’ tabet, anan che kinuri, ak eng’ tuguk alak tugul che kigerisie ak che terjin eng’ oindo;
ak kogochi Jehovah kagochinoik tugul che kibeelei eng’ sabatosiek, ak ye kaleel arawet, ak eng’ igorwek che kiging’at, eng’ koitenywa ko u ng’atutiet ne kiging’at agobo ichek, eng’ betusiek tugul eng’ taitab Jehovah: