A Eleyazaar buudã sʋka, kom-dibli nins sẽn dag n yaa kãsem-dãmbã sõor dag n yɩɩda a Itamaar kom-dibli wã. Yaa rẽ yĩng tɩ b pʋɩ a Eleyazaar yagensã sul piig la a yoobe, la b pʋɩ a Itamaar yagensã sul a nii.
A Netaneyɛll biig a Semaya sẽn yaa Leevi buudã ned a yembrã yaa gʋlsda. Yẽnda gʋlsa bãmb yʋyã rĩmã ne na-biisã taoore, la maan-kʋʋd a Sadok ne a Ayimelɛk sẽn yaa a Abiyataar biigã taoore, la maan-kʋʋdbã ne Leevi buudã kãsem-dãmb taoore. B yãka a Eleyazaar buudã kãsem a yembre, la b yãk a Itamaar buudã me kãsem a yembre.
Yaa woto la b pʋɩ ned kam fãa ne a tʋʋmde, tɩ b na n kẽed Sẽn-Ka-Saab roogẽ wã, wa sẽn zems noor ning b sẽn dag n tũnug bãmb ba a Aarõ n kõ bãmbã, la wa sẽn zems Sẽn-Ka-Saab sẽn yaa Israyɛll Wẽnnaamã sẽn dag n yeelã.
Bãmb me ne b ba-biisã sẽn yaa a Aarõ kom-dibli wã maana poeer dĩm a Davɩɩd ne a Sadok la a Ayimelɛk ne maan-kʋʋdbã buudã kãsem-dãmba, la Leevi buudã kãsem-dãmb taoore. B maana a woto ne buud fãa kãsma, la hal baa ne sẽn yaa-a yao-zʋʋg b saam-biisã sʋkã.