Ki itabaan kogeny Daudi ak kiptainigap lugeet alak eng' weeriigap Asaph, che po Herman, ak che po Jeduthun, kotaabanji poisyet, si komaotenso eng' ketubosyek, kibugandinik ak sanisyek che po sugunonik che kibirei. Koitetap icheeget che kiyaei poisyet ko uu otisyennywa ko:
Che po weeriigap Asaph ko ki Sakur, Joseph, Netania, ak Asarela. Kiboisye icheek ko ki indochin kwandanywa, Asaph, ne ki maoteni, ko uu ng'atuutyetap laitoryat.
Ki sich Jeduthun weeriik chooto ko: Gedalia, Seri, Jesaia, Shimei, Hasabia, ak Matitia, lo; che ki indochin kwandanywa Jeduthun kobutei ketubet, che ki maoteni, kimwaei kongoi ak kolasu Kamuktaindet ne Toroor.
Chuuto tugul ko ki weeriigap Herman keerindetap laitoryat eng' ng'aleegap Kamuktaindet, konamji parak kuinet. Ak ki igoochi Kamuktaindet Herman weeriik taman ak ang'wan ak tiibiik somok.
Ki pou chuuto tugul kwandanywa si kotyenso eng' kootap Kamuktaindet ne Toroor, kotinyei sanisyek che po sugunonik che kibirei, ak ketubosyek, agobo otisyetap kootap Kamuktaindet. King'atei laitoryat Asaph, Jeduthun ak Herman.