Chuto tugul ko ki werikab Obed-edom: icheget ak werikwak ak tupchosiekwak ko ki bik che kimen eng’ kimnatet agobo otisiet; ki bik tamanwogik lo ak aeng’ che bo Obed-edom.
Ak kibunji barbariat ne kitokyigei kong’asis Selemia. Yeityo koser barbarek agobo Sekaria werinnyi, kiruogindet ne ng’om; ak kimong’ barbariandennyi kotokyigei murot ne bo katam.
Kimi Lawik lo komostab kong’asis, komi ang’wanu komostab murot ne bo katam betut age tugul, komi komostab murot ne bo tai ang’wanu betut age tugul, ak ki aeng’ aeng’ che bo got ne kigonore tuguk.
Kibou Selomotinito ak tupchosiekyik komoswek tugul ole kigonore tuguk che itabanotin, che kiga kotaban laitoriat Daudi, koboto kandoikab gorikab kwanisiek, ak kiptainikab elfusiek, ak che bo bogolwogik, ak kiptainikab luget.
Kibou Selomot ak tupchosiekyik tuguk tugul che kiga kotaban Samuel keerindet, ak Saul weritab Kis, ak Abner weritab Ner, ak Joab weritab Seruia, koboto kiy age tugul ne kiga kotaban chi age tugul.
Eng’ Hebronik, ko kiribei Asabia ak tupchosiekyik, bik che nyigonen elfut agenge ak bogol tisab, Israel eng’ Jordan bitonin komostab cherongo; agobo boisionik tugul che bo Jehovah, ak otisietab laitoriat.
Che bo Hebronik, ko ki Jerija ne o, che bo Hebronik, ko u ibinwekwak, eng’ gorikab kwanisiek. Kigicheng’ bichoto eng’ kenyitab artam ne bo laitornatetab Daudi, ak kibiit eng’ ichek bik che kimen che nyigonen eng’ Jaser ne bo Gilead.
Ak tupchosiekyik, che ki bik che nyigonen, ko kiek elfusiek aeng’ ak bogol tisab, kandoikab gorikab kwanisiek, che kiinde laitoriat Daudi koboi bikab Reuben, ak Gadik, ak kebebertab bororietab Manase, agobo kiy age tugul ne tokyingei Kamuktaindet, ak ng’alekab laitoriat.