Kä cu kɛn ti̱ti̱ diaal a gaat O-bed-ɛ-dom, kɛɛl kɛ gaatkiɛn kɛ ji̱ maarädiɛn, cu ka nɛy ti tekɛ lua̱ŋ mi di̱i̱t. Kä cu pekdiɛn a nɛy ti jiɛɛn bäkɛl wi̱cdɛ rɛw.
Kä cu thok kuec käny ca̱ŋ pɛn kä Cɛ-lɛm-yaa. Kä cua gaak yuɔr kɛ kui̱ gatdɛ ni Dhɛ-kar-yaa, ɛ ram mi la lat luek, mi gɔaa, cu thok kuec caam pɛn kä jɛ.
Kä la ji̱ Lii-bay da̱ŋ bäkɛl a yien thok kuec käny ca̱ŋ kɛ cäŋ kɛl, kä la ŋuaan a yien thok kuec caam kɛ cäŋ kɛl, kä bi ŋuaan yien thok kuec cuëëc kɛ cäŋ kɛl, kä la nɛy da̱ŋ rɛw a yien kɛɛl kɛ cäŋ kɛl thok duëël tɔ̱ɔ̱wä.
Kä cua tëë ca lɛy ɛ gök ni Tha-muɛl kɛnɛ Thɔɔl gat Kic kɛ Ä-bi-ner gat Ner kɛ Yo-ab gat Dhɛ-ru-yaa, kɛ te kɔ̱ŋ tëë ca lɛy rɔm ɛ Cɛ-lo-moth kɛnɛ ji̱ maarädɛ.
Kä gaat Ɣɛb-ron. Cua Ɣä-cɛ̈b-yaa kɛnɛ ji̱ maarädɛ ti bathdɔɔr kɛl wi̱cdɛ kur bärɔw ti tekɛ lua̱ŋ ka̱m lät kuoothä kɛnɛ lät kua̱r kä ji̱ I-thɛ-rɛl diaal tin te kui̱ konyä ca̱ŋ yiëër Jɔr-dɛn.
Kä gaat Ɣɛb-ron. Cu Yɛ-ri-yaa a bo̱o̱thdiɛn nikɛ gɔ̱a̱r duëlikiɛn. (Kɛ jiɛɛn ŋuaan runi ruec kua̱r ni Dee-bid, cua warɛgakni go̱r, cua nɛy ti tekɛ lua̱ŋ wä jek kä ji̱ Ɣɛb-ron kä Ya-dhɛr rɛy cieŋ Gil-yad.)
Kä ɛn Yɛ-ri-yaa tekɛ ji̱ maarä ti bathdɔɔr kɛl wi̱cdɛ kur bärɔw, nɛy ti tekɛ lua̱ŋ, kä bööth thuk duëli gua̱ni, cu kuäär ni Dee-bid kɛ ka̱m lat Kuoth kɛnɛ cieŋ ji̱ I-thɛ-rɛl tin te kui̱ kony ca̱ŋ yieer Jɔr-dɛn rɛy cieŋ Rɛ-u-ben kɛnɛ Gad kɛ tha̱a̱ŋ thuɔk duëël Ma-na-thɛ.