Hezy he Izarei pho pawhrâhpazy, pheisaih sâh kha hyutuhpazy, pheisaih za kha hyutuhpazy nata ama ry liata hyutuhpazy ama châ. Âmo cha kyh to liata bei chakao ta, kô chhôh zydua ta thla chareih ta a thla lymâ awpazy châ ei ta, py kha liata maluh 24,000 lymâ ama y.
Benai he pasaipha sythôh hry liata a hlaopa kha châ ta, pasaipha sythôhzy hyutuhpa a châ. A sawchapawpa Amizabâ cha ano py liata pheisaih hyutuhpa a châ.
Thla palihna châta pheisaih hyutuhpa papalihna cha, Zôabâ unawhpa Asahe châ ta, a sawchapawpa Zebadiah cha ano a pazipa châ ta, a py liata pheisaih 24,000 ama y.
Hezy he Izarei chizy hyutuhpazy ama châ: Rubena chi hyutuhpa cha Zikari sawchapawpa Elieze châ ta, Simeôna chi hyutuhpa cha Mâkâ sawchapawpa Sephatiah a châ.
Abei sôh mohôhtuhpa cha Adie sawchapawpa Azamâve châ ta, lyuzy, khihpizy, khitawzy nata o sâhpazy liata abei sôh mohôhtuhpa cha Uzia sawchapawpa Zawnathâ a châ.
Saraw si panyupa su liata sahroh zaw mohôhtuhpa cha Saraw chyhsa Sitai châ ta, saikao liata sahroh zaw mohôhtuhpa cha Adalai sawchapawpa Saphâta a châ.
Dâvi puhpa Zawnathâ cha chyhsa sopa nata châthaipa a châpa vâta, ryhraokheituhpa a châ. Ano nata Hâkamôni sawchapawpa Zehie cha abei sawchapawzy pachutuhpa ama châ.