Daawuda mooɓti mawɓe Isra'iila fuu haa Urusaliima: Baaba-ci'e'en e hoore'en geɓe huuwanooɓe laamiiɗo e ardiiɓe dow honooɓe ujineere e ardiiɓe dow honooɓe teemerre e aynooɓe marle e dabbaaji e ɓikkoy laamiiɗo e saraaki'en e suusɓe e marɓe daraja fuu.
Laamiiɗo Daawuda dari, wi'i: “Naneeɗam, onon deerɗiraaɓe am e ummaatoore am! Mi anniyino nyiɓugo suudu siwtordu ngam sundukru alkawal Jawmiraawo e ngam jooɗorde Allah meeɗen. Mi taaskani nyiɓugo.
Jawmiraawo Allah Isra'iila suɓi yam nder saare baaba am haa mi laato laamiiɗo Isra'iila haa foroy, o suɓi Yahuuda ngam haa o laato ardiiɗo, nder danygol Yahuuda boo o suɓi saare baaba am. Caka ɓiɓɓe baaba am boo, ɗum fottani mo o waɗammi laamiiɗo dow Isra'iila fuu.
Ngam maajum yeeso Isra'iila, jama'aare Jawmiraawo e yeeso Allah meeɗen, linye umrooje Jawmiraawo Allah mooɗon, ɗowtane ɗe haa on mara lesdi mboondi ndi'i, on marna ndi ɓiɓɓe mooɗon boo haa foroy.
An boo, ɓiyam Suleymaanu, teddin Allah baaba maaɗa, jaggana mo bee ɓernde laaɓnde e nafsu ma fuu. Ngam Jawmiraawo ɗon linya ɓerɗe fuu o anndi anniyaaji e numooji. To a waylitake heedi maako, o waŋgante. Ammaa to a acci mo, o wudinte haa foroy.
Nden Daawuda wi'i ɓiyum Suleymaanu: “Sey a semmbiɗa, a laato cuusɗo, a naŋnga kuugal. Taa hul, taa tampu sam, ngam Allah Jawmiraawo, Allah am wondan bee maaɗa. O accataa ma, o wudintaa ma, haa kuugal nder haykaliiru Jawmiraawo fuu timma.