Kä cu kuäär ni Dee-bid duɔl jiök i̱, “Gatdä ni Thɔ-lo-mon mi ca mɛk ɛ Kuoth ɛ, jɛn kui̱yɛ kä thilɛ mi ŋäcɛ, kä la̱t di̱tdɛ. Kä ɛn duel ɛ duŋ Kuɔth Nhial, /ciɛ duŋ ran.
Inɔ ɣän ca kuak jak kä te wa̱nɔ nikɛ buɔ̱mdä kɛɛliw kɛ kui̱ luaak Kuɔthdä, ca da̱a̱p jak kä te thi̱n kɛ kui̱ la̱t nyinä dääpä, kɛ ciɛk in bo̱r kɛ kui̱ la̱t nyinä cikä min bo̱r, kɛ ciɛk in yian kɛ kui̱ la̱t nyinä cikä min yian, kɛ yiëëth kɛ kui̱ la̱t nyinä yieethä, kɛ jiɛɛn kɛ kui̱ la̱t nyinä jiɛɛn, a /ci pääm tin di̱t kökdiɛn, kɛnɛ pääm tin tekɛ biɛɛl, kɛ päm mi ŋir ŋir, kɛ päm cärä lɔaac, te thi̱n kɛ pek mi di̱i̱t.
A lɛ̈ɛ̈ tin diaal tin ca rialikä kɛ kui̱ duëël in rɛl gɔɔydɛ rɔ mat thi̱n, kä ɣän ta̱a̱ kɛ da̱a̱pdä kɛnɛ ciɛk in bo̱r tin te tɔ̱ɔ̱wä. Kɛ ɣöö nhɔakä luak Kuɔthdä, ɣän ca kɛ thöp kɛ kui̱ luaak Kuɔthdä.
Ca da̱a̱p mi tekɛ ki̱luni ti bathdɔɔri diɔ̱k kä da̱a̱p mi ko̱k ko̱k thöp, kɛnɛ ki̱luni cikä min bo̱r mi ca lɛy mi tekɛ bathdɔɔri bärɔw, kɛ kui̱ ro̱thä pua̱ny luaak,
kɛnɛ kui̱ lätni diaal tin ba la̱t ɛ ji̱ ta̱th, ba da̱a̱p lät nyin dääpä kä ba ciɛk in bo̱r lät nyin cikä min bo̱r. Kä ɛŋa mi luäŋ ɣöö bi Kuoth Nhial thöp muc kɛ lɔcdɛ mɔ kä bi rɔ lëy ɛn walɛ?”
Cukɛ da̱a̱p mi tëë ki̱luni ti bathdɔɔri ti kuɔ̱r wi̱cdɛ jiɛɛn kɛnɛ ki̱luni ti bathdɔɔri ti kur diɔ̱k cikä min bo̱r, kɛ ki̱luni ti bathdɔɔri ti kur dhieec wi̱cdɛ jiɛn da̱ŋ ŋuaan cikä min yian, kɛ ki̱luni ti bathdɔɔri ti bathdɔɔri diɔ̱k ladiitä thöp kɛ kui̱ ta̱th luaak Kuɔth.
Kä di̱t kɛ buɔ̱m kɛ gɔɔy kɛ guëth kɛ nyinku lö Kuoth Nhial. Kä tin diaal tin te puɔ̱rä, kɛnɛ tin te piny kɛ nyinku. Kä ɛ ji̱n Kuäär in di̱t ni jɛn kä ti diaal.
Kä ji̱n lö Kuoth Nhial Kuoth gua̱ndɔɔŋnikɔ ni A-bɛ-ram kɛ Ay-dhɛk kɛnɛ I-thɛ-rɛl, rɔmni nɛmɛ lo̱cni nɛɛniku amäni cäŋ kɛl, kä jak ni lo̱ckiɛn ka tiɛtkɛ ji̱ ni ciaŋ.
Kä cu Dee-bid duɔl jiök kɛɛliw i̱, “Puanyɛ Kuoth Nhial min la Kuothdun.” Kä cu duɔl kɛɛliw Kuoth Nhial min la Kuoth gua̱ni puany, kä cu kɛ jɛ pal, kä cu kɛ kuäär lät kä luth.
Cu kɛ mi̱th kä cu kɛ maath kɛ tɛth lɔaac ɛn cäŋ ɛmɔ nhiam Kuoth Nhial. Kä kɛ gua̱th in rɛwdɛ, cukɛ gat Dee-bid ni Thɔ-lo-mon jak kä kuäär. Kɛ ciöt Kuɔth Nhial cukɛ jɛ kuany ala rueecdiɛn, kä cu Dha-dok a bo̱o̱th palä.
Kä cu Thɔ-lo-mon nyuur wi̱i̱ kɔam kuäärä mëë ci Kuoth Nhial ɛ yiath piny kɛ gua̱th gua̱n ni Dee-bid. Kä cua kuäär mi gɔaa kä cua luɔ̱th ɛ ji̱ I-thɛ-rɛl diaal.