Isirayɛli deen fɔlɔ Urubɛn deenw filɛ nin ye. (Ale Urubɛn le tun ye kɔrɔ ye u facɛ fɛ, nga a lara n'a facɛ ka gɛrɛfɛmuso ye minkɛ, o la, a ka kɔrɔya bɔsir'a la, ka di Isirayɛli deen Yusufu deenw ma. O la, u tun t'a jati i n'a fɔ u kɔrɔ tugu.
Urubɛn kɔmɔgɔw, ni Gadi taw, ani Manase taw tilancɛ niin tun be cɛfariw cɛma. U tun be se nigɛkunbɛnnanw ni murujan na, ani kalabon na fana. U tun be se kɛlɛ la. U ka mɔgɔ waa bi naani ni naani ani kɛmɛ wolonwula ni bi wɔɔrɔ (44 760) le tun be se ka taga kɛlɛ la.
U tun ye dɛmɛ sɔrɔ, Ala ye agariw don u bolo, ani minw bɛɛ tun be ni olu ye. Bari k'u to kɛlɛ la, u ye Ala daali. A fana y'u jaabi, bari u tun y'u jigi la a kan.
U y'u ka begɛnw minɛ: ɲɔgɔmɛ waa bi duuru (50 000), ni begɛnmisɛn waa kɛmɛ fila ni waa bi duuru (250 000), ani fali waa fila (2 000), ni mɔgɔ waa kɛmɛ (100 000).
Manase kɔmɔgɔw tilancɛ sigira jamana nin kɔnɔ k'a ta * Basan mara la, worodugu ɲafan fɛ, fɔɔ ka taga se Baalɛrɛmɔn ni Seniri, Ɛrɛmɔn kulu kan, kɔgɔdugu faan fɛ. U tun ka ca.
O la, Isirayɛli ka Ala y'a to Asiri masacɛ Puli n'u b'a wele fana ko Tiligati Pilinezɛri, ale dimina u kɔrɔ ka wili u kama, ka Urubɛn kɔmɔgɔw ni Gadi taw, ani Manase taw tilancɛ minɛ ka taga n'u ye Hala ni Abɔri, ani Ara, ni Gozan baa daa la. U tora o yɔrɔ la fɔɔ ka na se bii ma.