Weeriigap Reuben taitap Israel, (Nganda kitaita iman ineendet, ko ki imurwon itoogutap kwandanyi, ki kigoochi etunatennyi ne po sigeet weeriigap Joseph weeriitap Israel; ak ma kiit tetuutigap ibinwek che ki kosiirto kisube etunatetap sigeet.
Ki yai lugeet icheek ak Hagrik eng' peetuusyegap Saulo, ak ki pek eng' eunekwak. Ki meny emaisyekwak eng' emet tugul eng' komostap kong'asiis ne po Gilead.
Weeriigap Reuben, che po piigap Gad, kebebertap pororyetap Manasseh, che po piik che nyigoonen, murenik che ki imuuchi koip long'eet ak rotwetap chok, ak komwokse kwanget, ak kongen lugeet komyee, ko ki eliphuusyek artam ak ang'wan ak pogol tisap ak tamanwogik lo che ki imuuch komanda koba lugeet.
Ki kitoret kobargei ak icheeget, ak ki kinde Hagrik eunekwak, kobooto tugul che ki mi kobooto pichooto, amu ki riirchi Kamuktaindet komi lugeet, ak ki kas riirekwak, amu ki imang' ineendet.
Chu ko ki kandoigap kooriigap kwanisyekwak: Epher, Isi, Eliel, Asriel, Jeremiah, Hodabiah ak Jadiel. Icheek ko ki piik che kiimeen, che nyigoonen, che taagunotiin ak kandoigap kooriigap kwanisyekwak.
Ki ing'eet anyun Kiptaiyat Kamuktaindetap Israel Pul laitoryatap Assyria, ak Tilgath-pilneser laitoryatap Assyria, ak ki imut, piigap Reuben, piigap Gad, kebebertap pororyetap Manasseh koba emet ne ma nenywa. Ki imut koba Hala, Habor, Hara ak kot koit aineetap Gosan, agoi ra.