Tsono Aisraele onse adalembedwa potsata mibadwo yao m'buku la mafumu a Aisraele. Anthu a ku Yuda adaatengedwa ukapolo kunka ku Babiloni chifukwa chakuti anali osakhulupirika.
Panalinso Adaya, mwana wa Yerohamu, mwana wa Pasihuri, mwana wa Malikiya, ndiponso Maasai mwana wa Adiyele, mwana wa Yazera, mwana wa Mesulamu, mwana wa Mesilemiti, mwana wa Imeri.
Panalinso Obadiya, mwana wa Semaya, mwana wa Galali, mwana wa Yedutuni, ndiponso Berekiya, mwana wa Asa, mwana wa Elikana, amene ankakhala ku midzi yoyandikana ndi tauni ya Anetofati.
ndipo mpaka nthaŵi imeneyo, anthu a fukoli adaikidwa kuti azilonda pa khomo lakuvuma la Mfumu. Ameneŵa ndiwo amene kale anali alonda apamakomo ku zithando za Alevi.
Salumu mwana wa Kore, mwana wa Ebiyasafu, mwana wa Kora, pamodzi ndi abale ake a ku banja la makolo ake, Akora aja, ankayang'anira ntchito ya utumiki pakhomo pa chihema, monga ankachitira azibambo ao, amene ankayang'anira mudzi wazithando wa Chauta ndi kulonda pa chipata.
Onseŵa, amene adasankhidwa kuti akhale alonda apamakomo, analipo 212. Adalembedwa potsata mibadwo yao ku midzi yao. Davide ndi Samuele mneneri ndiwo adaŵaika m'malo ao a ntchito chifukwa cha kukhulupirika kwao.
Ena mwa iwowo adasankhidwa kuti aziyang'anira zipangizo ndi ziŵiya zina zopatulika. Ena ankayang'anira ufa wosalala, vinyo, mafuta, lubani ndiponso zonunkhira.
Alevi ena akuluakulu ankayang'anira oimba nyimbo. Iwowo ankakhala m'zipinda m'Nyumba ya Chauta, osamangika ndi ntchito zina, pakuti ankatumikira usana ndi usiku.