×

Ika Bible 2018

2 Ihiẹn Mẹni 1

1
Solomọnụ nwa Defidi nọ gba mkpọgụn ọhụnma-ọhụnma imẹ alị-eze ẹ — makẹni Osolobuẹ wụ Chuku ẹ nọyen'ẹ anọyeni, bushi ẹ elu ọda-ọda.
2
Solomọnụ nọ gwa ndị Izrẹlụ ile oku — kẹ ndị ọkị-agha uku kẹ ndị ọkị-agha nta kẹ ndị e dọnzi oku kẹ ndị-ndu ile rị Izrẹlụ kẹ ndị kịsọnmẹ ikpụlọ ichẹn-ichẹn.
3
Ya kẹ Solomọnụ lẹ ndị Izrẹlụ ile nọ shi ebẹhụ jẹn elu rị Gibiọnụ, makẹni Ọdụ-ozuzu Chuku rị ebẹhụ, Ọdụ hụ odibo Osolobuẹ wụ Mozizi mẹmẹ kẹ wẹ rị imẹ atụ.
4
Defidi e te ghagụọ obodo Kiriatị-Jiarim bupụha Ẹkpẹti Chuku, bu ẹ tọ ebe ọ mẹmẹtọn'a, makẹni Defidi a rụntọgụọn'a ọdụ imẹ Jerusalẹm.
5
Kanị, ukpo nchụn-ẹjan ahụn Bẹzalẹlụ nwa Uri nwa Họ gi igwe-bronzu rụn rị Gibiọnụ, ihun Ọdụ-nsọ Osolobuẹ. Ịya haịn Solomọnụ lẹ Izrẹlụ ahụn ile zuni gi jẹn ebẹhụ d'a chọ ihun Osolobuẹ.
6
Solomọnụ nọ nyinrin ukpo nchụn-ẹjan ahụn wẹ gi igwe-bronzu mẹmẹ, hụn rị ihun Osolobuẹ, imẹ Ọdụ-ozuzu, nọ elu ẹ gi anụ nnụ-uku (1,000) chụn ẹjan w'a dụn ọkụn.
7
Imẹ abalị ahụn, Chuku nọ bịa d'e kunrun Solomọnụ, sị a, “Rịọ ihiẹn ọwụlẹ ị chọ nị m ye i.”
8
Solomọnụ nọ sị Chuku, “Y'e mẹgụọnị nẹdi m wụ Defidi ẹregede ọhụnma, y'e tumẹgụọ m nwan eze gi nọkin ẹnya a.
9
Osolobuẹ wụ Chuku, mẹzu nwan nkwa hụ i kwe nẹdi m wụ Defidi, ebe o mẹni y'e tumẹgụọ m eze, nị m kị ndị alịnị bu ọda kẹ ẹjan rị alị.
10
Ye m uche lẹ amamihiẹn, kẹni m s'ẹka kị ndịnị. Onyẹ k'a sa ẹka kị ndị nke i ni bugbu enwẹn wẹ ọda?”
11
Ya Osolobuẹ nọ sị Solomọnụ, “Ebe o mẹni ihiẹnni k'i bu obi, hụn wụ nị y'a rịọnị m akụ-lẹ-ụba, y'a rịọnị ọghọ, y'a sịnị m gbupụn'ị ndị iṅẹnrẹn i, y'a rịọnị m ụtọmị, kanị akọ-lẹ-uche lẹ amamihiẹn y'e gi kị ndị nke m hụn m tumẹ i n'ị kị,
12
m rị nwan e ye i akọ-lẹ-uche hụ lẹ amamihiẹn hụ; m k'e yezi i akụ-lẹ-ụba lẹ ọghọ, ụdị hụn ọ wụnị onwọntuni eze nwọnn'ẹ imẹ ndị bu i ụzọ kị mọbụ hụn k'e nwọnn'ẹ imẹ ndị k'a kị ị kịgụ.”
13
Solomọnụ nọ gha Ọdụ-ozuzu, ebahụn jẹn elu rị imẹ Gibiọnụ, lashi Jerusalẹm, ebe ọ gha a kị Izrẹlụ.
14
Solomọnụ kpọn ụgbọ-ẹshin lẹ ẹshin jun. O nwọn ụgbọ-ẹshin nnụ kwasị nnụ-uku (1,400) lẹ ẹshin nnụ-uku mmẹbụọ (12,000); o butọsọnmẹ wẹ obodo ndị ọ họrị cheni ndị o butọ ebe ya nwẹn rị imẹ Jerusalẹm.
15
Ọkịkị eze wụ Solomọnụ mẹ siliva lẹ goru barahị imẹ Jerusalẹm kẹ ọmụma dọn jun Jerusalẹm, mẹ osisi sida w'a chọ achọ barahị kẹ osisi sikamọ dọn barahị ẹgbẹrẹ Shẹfẹla rị ukun ugu.
16
Alị Ijiptu lẹ alị Kue kẹ Solomọnụ gha e nwọnhẹn ẹshin. Ndị a zụnị eze afịa e jẹn Kue d'e bulụa wẹ. Kanị wẹ e ṅọn wẹ e ṅọn.
17
Wẹ e ṅọnrin wẹ ọda imẹ alị Ijiptu. Akpụrụ egho siliva ọgụn-iri kwasị nnụ (600) kẹ wẹ gi e ṅọn ụgbọ-ẹshin ohu, e ṅọn ẹshin ohu akpụrụ egho siliva iri kwasị ọgụn-ẹsa (150), a nọ wẹ imẹ wẹ reye ndị-nze Hẹti lẹ ndị-nze Aram.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes