×

Ika Bible 2018

2 Ihiẹn Mẹni 10

1
O mẹgụ, Rehobụam nwa Solomọnụ nọ jẹn Shẹkẹm, makẹni Izrẹlụ ile e shigụọ Shẹkẹm nị wẹ hụn ụzọ kin ẹ eze.
2
Hụn Jerobụam nwa Nebatị gihụ nụ ihiẹnni ebe ọ rị Ijiptu hụn ọ gbashi ogẹn o gi gbapụnị Eze wụ Solomọnụ, ọ nọ gha Ijiptu lụa.
3
Ya wẹ nọ zi wẹ d'a kpọha Jerobụam, ịya lẹ ndị Izrẹlụ ile nọ jẹn d'e kunrun Rehobụam, sị a:
4
“Nẹdi i bu okẹn ibu che ẹnyi olu; belụa nị nwan ẹnyi okẹn ọrụn lẹ okẹn ibu hụ o buche ẹnyi olu, nị ẹnyi femẹ i.”
5
Rehobụam nọ sị wẹ, “Akpọhịn ẹtọ tannị ụnụ e kinhẹn.” Wẹ nọ la.
6
Ya kẹ Rehobụam wụ Eze nọ jụ ndị-ichẹn, hụn fe nẹdi ẹ wụ Solomọnụ k'ọ rị ndụn, sị, “Kị ụnụ sị m shịarị ndịnị?”
7
Wẹ nọ sị a, “I mẹni ndịnị ẹfọma, mẹ n'ọ sụọ wẹ, kweri ihiẹn wẹ rịọ, wẹ k'a wụsọnmẹ ihu i.”
8
Kanị, Rehobụam a jụ ọdụn ndị-ichẹn ahụn dụn a, ọ jẹn d'a jụ ikorọbịa ịya lẹ wẹ gba sue rị e fen'ẹ ihiẹn o k'a shịarị.
9
Ọ sị wẹ, “Kị wụ uche ụnụ? Kị ẹnyi k'a shịarị ndịnị rị a sị m, ‘Belụa ibu nẹdi i bu che ẹnyi olu’?”
10
Ikorọbịa hụ ya lẹ wẹ gba sue nọ sị a, “Ihiẹn i jẹnkọ d'a shịarị ndị hụ sị ị, ‘Nẹdi i bu okẹn ibu che ẹnyi olu; mẹ nwan n'ọ rịnị ẹnyi nfe,’ wụ ọnwan: ‘Mkpịnsịn-ẹka nta m kadẹ ukun nẹdi m.
11
Nẹdi m buye ụnụ okẹn ibu; m k'e buzidẹ ibu chen'ẹ. Nẹdi m gi mkpịnsịn mmaka sọn ụnụ; akpị kẹ mmẹ nwẹn k'e gi sọn ụnụ.’ ”
12
O zu akp'ọhịn ẹtọ Jerobụam lẹ ndị Izrẹlụ ile nọ kinhẹn d'e kunrun eze wụ Rehobụam k'o dọn gwa wẹ, sị, “O zu akp'ọhịn ẹtọ, ụnụ e kinhẹn.”
13
Eze ashịarịnị wẹ oku ọhụnma. Ọ latọ ọdụn ndị-ichẹn ahụn dụn a,
14
weri ndụnmọdụn ikorọbịa, sị ndị Izrẹlụ, “Nẹdi m buye ụnụ ibu nyịnnị; m k'e buzidẹ ibu chen'ẹ. Nẹdi m gi mkpịnsịn mmaka sọn ụnụ; akpị kẹ mmẹ nwẹn k'e gi sọn ụnụ.”
15
Ya wụ, eze egọnni wẹ ntịn: ihiẹnni mẹni gha ẹka Osolobuẹ bịa kẹni ihiẹn Osolobuẹ gi Ahija onyẹ Shilo gwatọ Jerobụam nwa Nebatị hụn ụzọ mẹzu.
16
Ogẹn ndị Izrẹlụ ile gi hụn a nị eze egọnni wẹ ntịn, ịya kẹ wẹ nọ sị eze: “Elee hụn wụdẹ nke ẹnyi imẹ ẹbozo Defidi? Elee hụn ru ẹnyi imẹ nwa Jese? Ndị Izrẹlụ, lama nị iwe ụnụ! Ẹbozo Defidi, lepụma nị iwe ụnụ ẹnya!” Ya ndị Izrẹlụ ile nọ lama iwe wẹ.
17
Kanị ndị Izrẹlụ bi obodo ndị rịsọnmẹ Juda aghakwọnị okpuru Rehobụam pụ, ịya kịkwọ wẹ.
18
O mẹgụ, ogẹn eze wụ Rehobụam gi zi Adoram (Adoniram) hụn a kị ndị igbọn ọrụn, ndị Izrẹlụ nọ gi ọmụma magbu ẹ kanị eze nkẹ a hụnghọ isi ban ụgbọ-ẹshin ẹ, gbashi Jerusalẹm.
19
Ịya kẹ Izrẹlụ Ẹbamịn ugu nọ pụ okpuru ikpụlọ Defidi d'e ru tannị.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes