Sang pag-abot ni Haring Rehoboam sa Jerusalem, ginpatawag niya sing tingob ang 180,000 ka labing maayo nga mga soldado sang mga tribo ni Benjamin kag ni Juda. Nagplano sia sa pagpakig-away agod magbalik sa iya ang paggahom sa naaminhan nga mga tribo sang Israel.
“Indi pagsalakaya ang inyo kaparientehan nga mga Israelinhon. Pauli kamo tanan. Ang natabo akon kabubot-on.” Gintuman nila ang sugo sang Ginoo kag wala mag-away kay Jeroboam.
Ginpamakuran niya ini nga mga siudad sang malig-on kag nagbutang sang pangulo sa kada-isa sa ila. Sa tagsa ka siudad ginbutangan niya sang madamo nga mga kalan-on, lana sang olivo kag bino,
Ginbayaan sang mga Levita ang ila mga palahalban kag iban nga duta kag nagsaylo sa Juda kag Jerusalem, tungod kay si Haring Jeroboam sang Israel kag ang iya mga tal-os indi magpasugot nga mag-alagad sila subong mga pari sang Ginoo.
Si Jeroboam nagpili sang iya kaugalingon nga mga pari sa pag-alagad sa mga lugar nga ginasimbahan sang mga pagano kag sa pagsimba sa mga demonyo kag sa mga diosdios nga iya ginhimo sa larawan sang mga baka.
Gikan sa tanan nga mga tribo sang Israel, ang mga tawo nga maminatud-on sa pagsimba sa Ginoo, ang Dios sang Israel, nagsunod sa mga Levita sa Jerusalem, agod nga makadulot sila sang mga halad sa Ginoo, ang Dios sang ila mga katigulangan.
Ini nagpalig-on sang ginharian sang Juda, kag sa sulod sang tatlo ka tuig ginsakdag nila si Rehoboam nga anak ni Solomon kag nag-estar sila nga yara sa idalom sang paggahom ni Haring David kag ni Haring Solomon.
Si Rehoboam nagpangasawa kay Mahalat nga ang iya amay amo si Gerimot nga anak ni David, kag ang iya iloy amo si Abihail, anak ni Eliab kag apo ni Jesse.
Sang ulihi ginpangasawa ni Rehoboam si Maaca nga anak ni Absalom, kag nag-anak sila sing apat ka mga lalaki nga amo sanday Abias, Atai, Ziza kag Selomit.
Tanantanan, si Rehoboam may desi-otso ka mga asawa kag sesenta ka mga babayi, kag may mga anak sia nga baynte otso ka lalaki kag sesenta ka babayi, pero sa tanan niya nga mga asawa kag mga babayi palangga gid niya si Maaca.
Si Rehoboam nagmaalamon sa paghatag sing mga katungdanan sa iya mga anak nga lalaki, kag ginbutang sila sa mga siudad sang Juda kag Benjamin nga napamakuran sang bug-os. Ginhatagan niya sila sing bugana para sa ila mga kinahanglanon kag ginpaasaw-an sila sing madamo.