×

Ika Bible 2018

2 Ihiẹn Mẹni 12

1
Ogẹn ukpo Rehobụam gi turugụ, ya nwẹn e kẹnrẹngụ, ịya lẹ ndị Izrẹlụ ile nọ gbakitọ Iwu Osolobuẹ azụụn.
2
Makẹni e gigụọ wẹ ẹka-ẹbụọ sọn Osolobuẹ, hụn mẹ ahụa isẹn Eze wụ Rehobụam kịma, Shishakị eze Ijiptu nọ bịa d'a lụsọn Jerusalẹm agha.
3
Ụgbọ-ẹshin agha nnụ-ẹtọ (1,200) lẹ madụ nnụ-uku ọgụn-ẹtọ (60,000) gi ẹshin a lụ agha k'o gi bịa, cheni ndị-agha bugbu enwẹn ẹ ọda hụn gha alị Ijiptu sọnhẹn ẹ: ndị alị Libia hụ a, ndị Suki hụ a, ndị Ẹtiopịa (Kushi) hụ a.
4
Ọ nọ mẹrisọnmẹ obodo Juda ndị hụ wẹ tụnhunmẹ mgbọn werisọnmẹ wẹ d'e rukwọrị Jerusalẹm.
5
Ogẹnni kẹ onyẹ-amụma wụ Shẹmaya nọ bịa d'a hụn Rehobụam lẹ ndị-isi Juda ebe wẹ gbakikomẹ imẹ obodo Jerusalẹm makẹni egun Shishakị rị a tụ wẹ; ọ nọ sị wẹ, “Lee ni ihiẹn Osolobuẹ kụ: ‘Ụnụ a lagụọ m tọ; mmẹ nwẹn a lagụọzị ụnụ tọnị Shishakị.’ ”
6
Ndị-isi Izrẹlụ lẹ eze nọ welụa enwẹn wẹ alị, sị, “Osolobuẹ wụ onyẹ-ezioku.”
7
Ogẹn Osolobuẹ gi hụn a nị wẹ welụa enwẹn wẹ alị, Osolobuẹ nọ gwa Shẹmaya okuni: “Ebe o mẹni e welụa wẹ enwẹn wẹ alị, etikpọkọzị m wẹ. Ẹghẹẹ, m k'a gbapụha wẹ ẹgwa. Aghakọzị m ẹka Shishakị hukpu Jerusalẹm ọnụma m.
8
Kanị, wẹ k'a rị okpuru ẹ, kẹni wẹ marịn ihiẹn rị ichẹn ẹgbata ifeni m lẹ ife ndị-nze alị ndị ọzọ.”
9
Shishakị wụ eze Ijiptu nọ nwan banye Jerusalẹm, ọ nọ buruchanrịn ihiẹn ile wẹ butọ imẹ Ụlọ-nsọ Osolobuẹ lẹ ihiẹn wẹ butọ imẹ obi-eze. O buruchanrịn ihiẹn ile, kẹ akpaịn ndị hụ Solomọnụ gi goru kpụ.
10
Ịya kẹ Rehobụam nọ nwan gi igwe-bronzu kpụzị akpaịn gi nọkin ẹnya ndị ahụn, bu wẹ ye ndị-isi ndị-nche, hụn e che nche ọnụ-mgbọn obi-eze.
11
Ogẹn ọwụlẹ eze jẹnkọ Ụlọ-nsọ Osolobuẹ, ndị-nche e buru akpaịn ndị hụ e sọn ẹ; o mẹgụ, e bukin wẹ wẹ ụlọ ndị-nche.
12
Makẹni Rehobụam welụa enwẹn ẹ alị, olulu Osolobuẹ te gi sọn ẹ nọ rọ, e tikpọchanrịnnị w'a: ihiẹn rị mma hụzịghọ Juda ogẹn ahụn.
13
Rehobụam gba mkpọgụn ọda-ọda imẹ Jerusalẹm, a kị. Ọ rị nwa ahụa ohu kwasị ọgụnnaị k'o ri eze, ọ nọ kị ahụa mmẹsa. Imẹ Jerusalẹm, obodo hụ Osolobuẹ họrị imẹ ebọn ile rị imẹ Izrẹlụ bu Ẹfan a che k'ọ nọ kị Izrẹlụ. Ẹfan nnẹ ẹ wụ Naama onyẹ alị Amọnụ.
14
Rehobụam mẹ eje-ihiẹn makẹni o buni obi ẹ che ife Osolobuẹ.
15
Ihiẹn ndị mẹni kẹ eze wụ Rehobụam rị a kị, gha mbidọn d'e ru ọgụgụ, rịsọnmẹ imẹ ẹkụkwọ onyẹ-amụma wụ Shẹmaya lẹ nke Ido hụn a hụn ọhụn, ẹhụhụọ ndị hụ wẹ deyesọnmẹ ẹbozo onyẹ-onyẹ. Agha-agha kẹ Rehobụam lẹ Jerobụam hụn kị Izrẹlụ Ẹbamịn ugu lụsọnmẹ.
16
Omẹgụ, Rehobụam a nwụnhụn, laburu ndị nẹdi ẹ, wẹ nọ li ẹ ye imẹ Obodo Defidi. Nwa Rehobụam wụ Abija nọ rikin ẹ eze.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes