Ak kitet luget Abija koboto lugetab murenik che nyigonen che bo luget, murenik elfusiek bogol ang’wan che kigilewen: ak kitet Jeroboam luget kobargei ak inendet kotinyei murenik elfusiek bogol sisiit, che kigilewen, bik che kimen, che nyigonen.
tos manyoljok onai ole kiigochi Jehovah Kamuktaindetab Israel, Daudi, bounatet koboi Israel koigeny, kiigochi inendet ak werikyik eng’ kayomisetab munyuk?
Ak kiiyumjigei inendet bik che yaach, werikab Belial, che kiigimitgei kobargei ak Reoboam weritab Solomon, ye kita ko ming’in Reoboam ak kotinyei rirge, ak ma imuch kogirinda ichek.
Ak nguno olen omuchi ogirinde bounatetab Jehovah ne mi eunekab werikab Daudi; ak o tuiyet ne o, ak otinye moek che bo tahabu che kiitang’wok Jeroboam koek kanamonik.
Ma oonu tisiikab Jehovah, werikab Aron, ak Lawik, ak olewenjige tisiik, osubi bitonwekab bikab emotinwek alak? Si age tugul ne nyonei koanyinyegei kirgit ak mengichik tisab, koegu noto tisiindetab tuguk che matilei kiy.
ak beeljin ichek Jehovah kagochinoik che kibeelei, ak nyamdutik che ng’uu ne anyiny, karonet age tugul ak koskoleng’ut age tugul: tetei makatinik che bo kabartaet eng’ meset ne tilil: ak keldab tait ne bo tahabu koboto taisiekyik, si kolal koskoleng’ut age tugul: amu kiribe boisietab Jehovah Kamuktaindennyo; ago kiomete inendet.
Ogeero, mi Kamuktaindet kobotech, kondoiywech, ak tisiikyik che tinyei iriagok che bo waagat si koguutwak ne bo waagat. Ee lagokab Israel, amat obarge ak Jehovah Kamuktaindetab kwanisiekwok: amu mobore.