Ka Abija daa ti faai siɣ’ o yaannim’ sani, ka bɛ sɔɣ’ o Dauda tiŋ’ la ni. Ka o bia Asa daa di nam zan’ o ba zaani. Asa ʒiɛmani maa ni, bɛ mini so daa bi tuhi tɔbu hal ni yuun’ pia.
O daa lan wurim Juda tiŋgban’ ni fɔntinsi ni zaa buɣa mini bɛ ni daa yi tuɣindi tulaale zim bimbin’ shɛŋa zuɣu la zaa, ka di zuɣu daa chɛ ka suhudoo be o nam ʒiɛmani maa ni.
Ka o daa me goondahi gili Juda fɔntinsi, vuhim ni daa be tiŋgbani maa ni saha shɛli, dama o mini so daa bi zabira. O daa bi tuhi tɔbu di yuma maa ni, dama Yawɛ daa ti o vuhim.
Ka o daa yɛli Judanima, “Chɛliya ka ti me fɔntinsi, ka me goondahi mini dufahira din du pam gil’ li, ka niŋ dunɔdaya mini dunokparitisi niŋ li. Tiŋgbani maa nyɛla ti dini, dama ti jɛmdila Yawɛ ŋun nyɛ ti Naawuni ŋɔ. Ti ni jɛmd’ o maa zuɣu ka o ti ti suhudoo luɣilikam maa.” Dinzuɣu ka bɛ daa me binshɛɣukam maa ka bɛ biɛhigu tɔŋ.
Ka Asa daa suhi Yawɛ ŋun nyɛ o Naawuni ŋɔ yɛli, “Yawɛ, a ni sɔŋdi bɛn mali yaa shɛm lala ka a sɔŋdi bɛn ka yaa gba. Yawɛ ŋun nyɛ ti Naawuni ŋɔ, sɔŋmi ti, dama nyini ka ti niŋ naani, ka zaŋ a yuli kana ni ti ti tuhi salo ŋɔ zaa. Yawɛ, nyini n-nyɛ ti Naawuni, di chɛ ka ninsal’ nyaŋ a.”
Ka Asa mini tɔbbihi bɛn daa be o sani maa daa kari doli ba ni Gɛra n-daa ku Itiɔpianim’ maa zaa ka so bi kpalim, dama Yawɛ min’ o tɔbbihi daa ku ba. Ka Judanim’ maa daa di nɛma pam chaŋ.
Ka bɛ daa nyaŋ tin’ shɛŋa din daa gili Gɛra maa nim’ zaa, dama Yawɛ yɛla daa gbahi ba dabiɛm. Ka tɔbbihi maa daa ʒe fɔntinsi maa zaa nɛma chaŋ, dama nɛma daa be tinsi maa ni.