Asa nowacho ni jo-Juda niya, “Wageruru miechwagi, kendo wachielgi gi ohinga man gi kuonde maboyo mag ng’icho, mi waketnigi rangeye miloro motegno gi lodi. Piny pod marwa, nimar waseluwo Ruoth Nyasaye ma Nyasachwa, mi osemiyowa kue kuonde duto.” Omiyo ne gigedo, kendo gidhi nyime maber.
Asa ne nigi jolweny ma jo-Juda alufu mia adek moting’o kuodi gi tong’, kod jo-Juda alufu mia ariyo gi piero aboro (280,000) moting’o okumbni gi atunge. Jogi duto ne thuondi mager.
Asa noywak ni Ruoth Nyasaye ma Nyasache niya, “A Ruoth Nyasaye ma Nyasachwa, konywa nikech wageno kuomi, kendo wabiro rado gi ogandani mana e nyingi. A Ruoth Nyasaye, in e Nyasachwa, kik dhano adhana loyi!”
Ne giketho mier duto mokiewo gi Gera, nikech luoro moa kuom Ruoth Nyasaye nomako pinyno. Ne giyako miego duto, nimar ne nitie mwandu mang’eny ma noyudo jogo oseyako.