×

Ika Bible 2018

2 Ihiẹn Mẹni 15

1
Mmọn Chuku nọ ban imẹ Azaria nwa Odẹdi,
2
Azaria nọ jẹn d'e kunrun Asa, sị a, “Asa lẹ ndị Juda lẹ ndị Bẹnjamini ile, gọn ni m ntịn. Osolobuẹ a nọyeghọnị ụnụ omẹni ụnụ a nọdịyen'ẹ. Ụnụ chọ a, ụnụ k'a hụn a, kanị ụnụ gbakitọ a azụụn, ọ gbakitọ ụnụ azụụn.
3
Ọrọgbọ ahụa ole-lẹ-ole Izrẹlụ esọnni Chuku wụ Chuku nke-esi enwọn wẹ onyẹ nchụn-ẹjan a kuzini wẹ, enwọn wẹ Iwu.
4
Kanị, ogẹn wẹ gi rị imẹ nsọngbu, wẹ nọ gbehutọ buru Osolobuẹ wụ Chuku Izrẹlụ, chọ a, ọ nọ nị wẹ hụn a.
5
Ogẹn ahụn, onwọnni onyẹ jẹnkọnị mọbụ lụakọnị obi e ru alị, ndị alịnị ile rị imẹ okẹn nsọngbu ogẹn hụ —
6
alị hụ a bịangbu alị, obodo hụ e tikpọ obodo — makẹni Chuku rị e gi ụdị nsọngbu ile e kpokpo wẹ.
7
Kanị ụnụ nwẹn, kakẹnmẹni nwan. Anịkwọlẹ ni ndụn gụ ụnụ, makẹni ụnụ k'a narịn ụgwọ-ọrụn.”
8
Ogẹn Asa gi nụ oku ndịnị lẹ amụma hụ onyẹ-amụma wụ Odẹdi bu, obi ẹ nọ zekẹnmẹ. Ọ nọ kwapụchanrịn mmọn-lẹ-iyi ile rị alị Juda lẹ Bẹnjamini lẹ ndị rị obodo ndị hụ rị elu ugu Ifrem hụn o gi agha weri. Ọ nọ dọnzi ukpo nchụn-ẹjan Osolobuẹ hụn rị ihun ẹtu-ụlọ rị ihun Ụlọ-nsọ Osolobuẹ.
9
Ọ nọ kpọkikomẹ ndị Juda lẹ Bẹnjamini ile lẹ ndị Izrẹlụ Ẹbamịn ugu ghasọnmẹ Ifrem lẹ Manasẹ lẹ Simiọnụ bịa hụn bi imẹ igunrun wẹ, makẹni ndị bu ọda a ghagụọ Izrẹlụ Ẹbamịn ugu lụaburuhẹ ẹ ogẹn wẹ gi hụn nị Osolobuẹ wụ Chuku ẹ nọyen'ẹ anọyeni.
10
Wẹ ile nọ zu imẹ Jerusalẹm. Ifọn nke ẹtọ kẹ wẹ gi zu, ahụa nke mmisẹn Asa kịma.
11
Wẹ nọ weri efin ọgụn-mmisẹn kwasị nnụ (700) lẹ atụnrụn lẹ ewu nnụ-uku ẹsa (7,000) imẹ ihiẹn wẹ kpọnlụa agha chụnyeni Osolobuẹ ẹjan.
12
Wẹ nọ kwerigbama nị wẹ k'e gi obi wẹ ile lẹ umẹ-ndụn wẹ ile fe Osolobuẹ, Chuku ndị nẹdi wẹ;
13
nị onyẹ sị o fekọ Osolobuẹ wụ Chuku Izrẹlụ, e gbu w'ẹ, kẹ onyẹ-uku kẹ onyẹ-nta, kẹ okẹnnyẹ kẹ okpoho.
14
Wẹ nọ weshi olu wẹ elu kun Osolobuẹ, e yi oro, e gbu opi lẹ ọdụn e ye ẹ.
15
Ndị Juda ile gi ịghọghọ kwe Osolobuẹ nkwanị — makẹni wẹ gi akpakalị obi wẹ kun Osolobuẹ, kwerigbama. Wẹ nọ wepụhachanrịn obi chọma Osolobuẹ, ọ nọ nị wẹ hụn a, Osolobuẹ nọ ye wẹ ezumikẹn azụụn ile.
16
Asa wụ eze a napụzịghọ nnẹ-ẹ-kanị wụ Maaka ọkwa nnẹ-eze, makẹni o zumẹ osisi wẹ gi a rụa Ashẹra. Asa nọ gbutu osisi hụ, wakịka a, nọ Ọdanmgbugbu-Kidrọnụ dụn a ọkụn.
17
Ọsụọn'a nị o wepụnị ebe jẹnsọnmẹ elu wẹ nọ e fe ofufe rịsọnmẹ azụụn hụn ẹbọ wụ Izrẹlụ-ugu, obi Asa rịchanrịn ebe Osolobuẹ rị o we nwụn.
18
Ọ kwabanzighọ goru, siliva lẹ ihiẹn ichẹn-ichẹn o gi kwanị Osolobuẹ lẹ ndị nẹdi ẹ gi kwanị Osolobuẹ imẹ Ụlọ-nsọ Chuku.
19
Agha a lụzịnị o w'e zu ahụa mmisẹn kwasị ọgụn Asa kịma.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes