A yɩ n sega a Asa n yeel: «Asa, la yãmb fãa Zɩɩda la Bẽnzame rãmba, kelg-y! Yãmb sã n pa ne Naaba-Wẽnde, bãmb me paada ne yãmba. Yãmb sã n gẽesd-ba, b basdame tɩ b yãend-ba. Yãmb sã n zãag ne-ba, bãmb me zãagda ne yãmba.
A Asa wʋma bãngda goama, n yeel t'a na n yiisa wẽn-naandsa sẽn da be Zɩɩda ne Bẽnzame tẽn-peelmẽ la tẽnsã sẽn be Efrayim tãnga zugu, a sẽn da pãb n deese. A le manega maan-kugrã sẽn da rɩg wẽnd dooga zãonga noore.
A kɩtame tɩ Zɩɩda ne Bẽnzame tigim taaba, n paas sẽn da yi-b Efrayim, Manase la Simeõ tẽn-peelmẽ tɩ bãmb wʋsg da zoe n kẽ-la a Asa, b sẽn yãend tɩ Naaba-Wẽnd da pʋgda a poore.
Zɩɩda rãmba fãa sũur yɩɩ noogo ne b kãabgã, tɩ ya bũmb sẽn sɩd yi sũurẽ. B bao Naaba-Wẽnd yamleoogo. La rẽ yĩnga, Naaba-Wẽnd me basame tɩ b yãend-ba la b kõ-b-la laafi ne b yagsa fãa.
Dĩm a Asa ma menga, a Maaka, ka le bool tɩ naab ma ye, tɩ yẽ ra kɩtame tɩ b pees wẽn-poak a Asera nin-naande. A Asa luba a yel-yaalgã, n to-a n bõgse, n yõog a bugum Sedrõ.