×

Mara Bible BSI 2023

2 Khokhuen 16

1
Âsâ kô sythôh nata kô charu â bei kô ta, Izarei bei Bâsâ cha Zudâh a kaw dyuh ta. Zudâh bei Âsâ lâta a ngia awpa nata a pua awpazy pakhâ nawpa ta Râmâ khih padua ta.
2
Âsâ ta Abeipa o sôh nata abei o sôh sonazy liata tâkâ nata ngôh zy la ta, Dâmaskâ liata a ypa Aramia bei Benhadâ lâ paphao ta, a hnohta,
3
“Ei paw nata na paw likah liata biehrai a ypa hawhta, nâma nata keima likah liata chhao biehrai y ta. Moh teh, tâkâ nata ngôh ei cha kaw paphao hih. Izarei bei Bâsâ ta einâ sysai thei nawpa ta, vawh la, a hnohta biehrai na taopa kha kei parao teh,” tah ta.
4
Benhadâ ta Bei Âsâ pahruana cha a pha tah ta, Izarei khihpizy a dyuh awpa ta pheisaih hyutuhpazy tuah ta. Chatanachata Izô, Dânâ, Abelamai nata Nâthalai râh liata hmobaoh sona khihpi zydua pahnie ta.
5
Cha thâtih cha Bâsâ ta a thei nahta, Râmâ khihpi a padua haipa cha a chalihsai ta, a raihria cha pachhâsa ta.
6
Chatawhcha Bei Âsâ ta Zudâh mo zydua a chhi ta, Bâsâ ta Râmâ khihpi padua nawpa ta a hmâpa lô nata tho zy paly ei ta, chazy hmâpa ta Kebâ nata Mizpâ khihpizy padua ta.
7
Cha nota hrohsopa Hânani cha Zudâh bei Âsâ la a vy ta, a hnohta, “ Abeipa na Khazohpa liata a pahnieh leipa chi ta, Aramia bei liata nâ pahniehpa vâta, Aramia bei pheisaihzy na ku tawhta ama pua haw.
8
Kusi mo nata Libia mozy kha pheisaih hluh ngaitapa, talailih nata arâ pheisaih hluhpi a hneipa châ veih ei ma? Châhrasala Abeipa liata nâ pahniehpa vâta, âmo cha na ku liata a cha hlâpa kha.
9
Abeipa mo cha, ano lâta palôh tlokhuh a paheihpazy thatlôpa ta bao awpa ta, khizaw zydua a tawpâ thlâh ha mâh tâh. Hru kawpa ta hmo tao chi ta, tahmâ tawhta cha, chariah a dyuh awpa khâ na hnei aw,” tah ta.
10
Âsâ cha hrohsopa chô liata a hiehâh ta, patâhna o liata khô ta. A biereipa vâta a chô liata a hie a hâh ngaitapa a châ. Âsâ cha chyhsa hropazy chhao pasa pataosa lymâ ta.
11
Âsâ thâtih cha âthaona tawhta achhâna taihta, Zudâh nata Izarei beizy châbu liata ropa a châ.
12
Kô sythôh nata kô chaki â bei kô ta, Âsâ cha a phei pasa ta, a pasapa cha thata paru ta. Châhrasala a pasana daihti lia chhao ta Abeipa pado leipa ta, dawhtyzy tlao a pado.
13
Âsâ cha kô sypalih nata kô kha â bei kô ta thi ta, a pathlatuhpazy hnohta â mô haw.
14
Dâvi khihpi liata ano châta thlâ â taopa liata pabu ei ta. Ropahâhpa taotuhpazy ta ia-ô chi to tawhta ama taopa ropahâhpa to ta a biepa rakhô liata pazia ei ta, ano palyupalihna châta mei thata patih ei ta.
Chin BSI Bible 2023
The Bible Society of India 2023
:
Save Notes