sị a, “Nị ẹnyi mẹgbama, mmẹ lẹ ịyụ — k'o dọn rị ẹgbata nẹdi m lẹ nẹdi i. Lee ẹ, m zilan'ị nwan siliva lẹ goru. Latọ Baasha eze Izrẹlụ hụn ịyụ lẹ ya wị e yetarị ẹka, n'ọ ha m ye.”
Bẹn-Hadadị nọ kweyeni Asa, zi ndị ọkị-agha a d'a maye obodo ndị rị Izrẹlụ Ẹbamịn ugu: e mẹri wẹ Ijọnụ, Danị, Ebẹlụ-Maim hụn wụzị Ebẹlụ Bẹt-Maaka lẹ obodo ile w'e butọ ihiẹn-oriri imẹ Naf'tali.
Ya kẹ Eze wụ Asa nọ nwan kpọnrin ikẹnnyẹ Juda ile, wẹ nọ jẹn d'e bukwama ọmụma lẹ osisi ile Baasha te gi a rụn Rama. Asa nọ gi wẹ dọnzi obodo Gẹba lẹ obodo Mizpa.
Ogẹn ahụn kẹ Hanani hụn a hụn ọhụn nọ bịa d'e kunrun Asa wụ eze Juda, sị a, “Makẹni i hatu Osolobuẹ wụ Chuku i, gi eze Aram dọn ẹnya, eze Aram a wanahịngụọ ị.
Ndị Kushi lẹ ndị Libia nẹi bugbu enwẹn wẹ ọda, uwẹ lẹ ụgbọ-ẹshin bu ọda wẹ gi a lụ agha lẹ igunrun ndị gi ẹshin a lụ agha a bịanị d'a maye i? Kanị, makẹni i gi Osolobuẹ dọn ẹnya, ọ nọ bu wẹ ile che i ẹka mẹri —
makẹni ẹnya Osolobuẹ rị a ghahunmẹ elu ụwa ile n'ọ hụn ụzọ gba ndị wechanrịn obi wẹ ile ye ẹ umẹ. Y'e zuzuọlẹ nzuzu. Agha sikọ d'a bịasọnmẹn'i nwan gha kikẹnni jẹnmẹ.”
Wẹ nọ li ẹ ye imẹ ili ọ kwadmẹtọnị enwẹn ẹ imẹ Obodo hụ Defidi tụn. Elu-ukpo wẹ kpọnjun mkp'ẹhụhụọ lẹ udẹn ndị e shin ọhụnma kẹ wẹ dọye ozun ẹ. Wẹ fiye ẹregede ọkụn ebe wẹ nọ a kwan a gi ye ẹ ọghọ.