Ka ngwaga wa masome a mararo a metšo e selelago wa pušo ya Asa gwa tšwa Baesa kgoši ya Isiraele, a lwa le Juda, a aga merako ya motse wa Rama, gore a thibele batho ba ba yago go Asa kgoši ya Juda, le ba ba tšwago go yena.
Go na le kgwerano ya rena ye e dirilwego ke tate le tatago. Disilifera le digauta šedio; yaa o hlanoše kgwerano ye o e dirilego le Baesa kgoši ya Isiraele, gore a ntlogele.
Benehadada a theetša se kgoši Asa a se bolelago, a roma balaodi ba dira tša gagwe, ba yo lwa le metse ya Isiraele, ba hula motse wa Iyone, le wa Dani, le wa Abele-Maimi, le metse ka moka ya dišego ya Nafutali.
Mehleng yeo gwa tla Hanani mmoni; a tla go Asa kgoši ya Juda a mo rera a re: O botile kgoši ya Siria, wa lesa go bota Morena Modimo wa gago; bjale dira tša kgoši ya Siria di go phonyokgile.
A ga ke re Bakushe bala, le Balibia bala e be e le madira a matona? Ba bile ba na le makoloi a mantši le banamedi ba ba bantši. Bona Morena a na a ba gafela seatleng sa gago ka gobane o be o botile yena.
Gobane mahlo a Morena a tsepeletše lefase ka moka, gore a bonatše maatla a gagwe ka bao ba lebeletšego yena ka pelo ka moka. Ke gona moo o šaeditšego; bjale ke mo o tlogo tsogelwa ke dintwa.
Asa, ka ngwaga wa masome a mararo a metšo e senyane wa pušo ya gagwe, o thomile go babja ke maoto, mme bolwetši bja gagwe bja mo golela; le mo bolwetšing bja gagwe ga a ka a nyaka Morena, a nyaka dingaka.
Ba mmolokile lebitleng la gagwe le a bego a epetšwe lona motseng wa Dafida, ba mmea malaong a bego a tletše dinoko le ditlolo tše di apeilwego ke dingaka, ba mo thuntšhetša diorelo tše ntšintši.