×

Ika Bible 2018

2 Ihiẹn Mẹni 17

1
Ya kẹ Jehoshẹfatị nwa Asa nọ rikin Asa eze. Ọ nọ dọnkwamachanrịn ihiẹn kẹni ọ saẹka gbọndọn ndị Izrẹlụ Ẹbamịn ugu.
2
O butọsọnmẹ ndị-agha imẹ obodo ndị Juda nwọn mgbọn, kwademẹ agha; o busọnmẹzi ndị-agha che imẹ Juda lẹ obodo ndị hụ rị Ifrem hụn Asa nẹdi ẹ gi agha narịn Izrẹlụ Ẹbamịn ugu.
3
Osolobuẹ nọyeni Jehoshẹfatị anọyeni, makẹni o sọn nzọmụkụ Defidi nẹdi ẹ kanị isi-ibuzọ hụ ọ kịma, ọ rụanị Baalụ ọwụlẹ.
4
Chuku, hụn nẹdi ẹ fe k'o fe, o mẹsọnmẹ ihiẹn ile o ku, o mẹni kẹ ndị Izrẹlụ Ẹbamịn ugu e mẹ.
5
Osolobuẹ nọ mẹ alị-eze hụ masị a ẹka ọhụnma-ọhụnma; Juda ile hụ e wẹhẹni Jehoshẹfatị ihiẹn, nke wụnị o họnrin okẹn-ọdanfịn, nwọnrin okẹn-ọghọ.
6
O bu obi ẹ ile che imẹ ihiẹn Osolobuẹ ku; o wepụchanrịn ebe jẹnsọnmẹ elu wẹ nọ e fe ofufe imẹ alị Juda lẹ osisi ndị hụ wẹ zumẹni onyẹnnyẹ-mmọn wụ Ashẹra.
7
Hụn mẹ ahụa ẹtọ ọ kịma, ọ nọ zi ndị ọrụn a wụ Bẹn-Haịlị, Obadaya, Zẹkaraya, Natanẹlụ lẹ Maịkaya d'a kuzi imẹ obodo ndị rịsọnmẹ Juda.
8
Wẹ lẹ ndị Livaị ndịnị: Shẹmaya, Nẹtanịa, Zẹbadịa, Asahẹlụ, Shẹmiramọtụ, Jehonatanị, Adonija, Tobija lẹ Tobu-Adonija — cheni ndị nchụn-ẹjan wụ Ẹlishama lẹ Jehoram.
9
Wẹ nọ ghagbarị Juda, wẹ lẹ Ẹhụhụọ Iwu Osolobuẹ wẹ gi, a kuzi wẹ; obodo ile rị alị Juda kẹ wẹ jẹnsọnmẹ, a kuzi ndị rịn'a.
10
Ya kẹ egun Osolobuẹ nọ tụma alị-eze ile nọhunmẹ alị Juda, nke wụnị a lụsọnni wẹ Jehoshẹfatị agha.
11
O nwọnghọdẹ ndị alị Filistia tụhanị Jehoshẹfatị ihiẹn ichẹn-ichẹn lẹ siliva; ndị Arabụ a kpụnhann'a ebulu ọgụn-iri kwasị nnụ-uku ẹsa lẹ mkpikpi (7,700) lẹ ewu ọgụn-isẹn kwasị nnụ-mmitenẹi (7,700).
12
Jehoshẹfatị hụ e kẹnrẹn, e kẹnrẹnwaye; ọ nọ rụnsọnmẹ ebe zeni w'a gbaban ogẹn agha lẹ obodo ndị w'e butọ ihiẹn-oriri imẹ Juda.
13
O kpọntọ ihiẹn-oriri ọda-ọda imẹ obodo ndị hụ rị Juda. O butọzị ndị-agha marịn ẹnya agha imẹ Jerusalẹm.
14
Kẹ wẹ dọn werisọnmẹ ndị-agha hụ ikp'ụlọ-ikp'ụlọ wụ ọnwan: Imẹ ndị Juda, ndị ọkị-agha uku wụ ndịnị: ọkị-agha uku wụ Adnaha hụn kị ndị-agha nnụ-uku ọgụn-mmisẹn (300,000);
15
hụn e sọnn'ẹ wụ Jehohananị, ndị-agha ọ kị rị nnụ-uku ọgụn-mmẹnọ (280,000);
16
o sọn Amasịa nwa Zikri, hụn wepụha enwẹn ẹ n'o k'a rụn ọrụn Osolobuẹ, ndị-agha ọ kị rị nnụ ọgụn-isẹn kwasị nnụ-nnụ (200,000).
17
Imẹ ndị Bẹnjamini: Ọkị-agha uku rịn'a wụ Ẹliada hụn wụ odogun-agha; ndị-agha ọ kị rị nnụ ọgụn-isẹn kwasị nnụ-nnụ (200,000) hụn e bu ụta lẹ akpaịn;
18
o sọn Jehozabadị. Ndị-agha ọ kị rị nnụ-uku ọgụn-itenẹi (180,000) bu ihiẹn-agha.
19
Uwẹ wụ ndị a rụnnị eze ọrụn, cheni ndị o butọsọnmẹ obodo ndị ahụn ọ tụnhunmẹ mgbọn hụn rịsọnmẹ azụụn ile imẹ Juda.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes