Nagbutang sia sing mga kusug sa tanan nga banwa nga napamakuran sa Juda, kag nagbutang sing mga pamakud nga balantayan sa duta sang Juda, kag sa mga banwa sang Efraim nga naagaw ni Asa nga iya amay.
Busa ginpalig-on sang Ginoo ang ginharian sa iya kamut; kag ang bug-os nga Juda nagdala kay Josafat sing buhis; kag may bugana sia nga manggad kag kadungganan.
Sa ikatlo nga tuig sang iya paghari ginpadala niya ang iya mga principe, si Ben-hail, si Abdias, si Zacarias, si Natanael, kag si Micaya, sa pagpanudlo sa mga banwa sang Juda;
kag upud sa ila ang mga Levinhon, si Semaias, si Netanias, si Zebadias, si Asael, si Semiramot, si Jonatan, si Adonias, si Tobias, kag si Tobadonias; kag upud sining mga Levinhon, si Elisama kag si Joram nga mga sacerdote.
Kag nagpanudlo sila sa Juda, nga yara sa ila ang tolon-an sang kasogoan sang Ginoo; naglibut sila sa tanan gid nga banwa sang Juda kag nagtudlo sa katawohan.
Kag ang kahadluk sa Ginoo nag-abut sa tanan nga ginharian sang mga duta nga yara sa palibut sang Juda, sa bagay nga wala sila mag-away batok kay Josafat.
Ang iban sang mga Filistinhon nagdala sing mga dolot kay Josafat, kag pilak nga sa buhis; ang mga taga-Arabia man nagdala sa iya sing mga panong nga pito ka libo kag pito ka gatus ka mga carnero nga lalaki kag pito ka libo kag pito ka gatus ka mga kanding nga lalaki.
Ini amo ang pag-isip sa ila sono sa ila mga kabaranggayan: gikan sa Juda, ang mga pangolo sang linibo: si Adna nga pangolo, upud sa iya ang tatlo ka gatus ka libo ka gamhanan nga mga tawo nga isganan,
kag madason sa iya si Amasias nga lalaking anak ni Zicri, nga naghalad sing kinabubut-on sang iya kaugalingon sa Ginoo, upud sa iya ang duha ka gatus ka libo ka gamhanan nga mga lalaki nga isganan.