O mẹpụ ahụa ole, ọ nọ jẹn Sameria d'a hụn Ehabụ. Ehabụ nọ gbuni ịya lẹ ndị ịya lẹ wẹ wị atụnrụn lẹ efin bu ọda, rịọ a n'o sọnjẹn ẹ d'a maye ndị Aram gi alị Ramọtụ-Gilẹdị ọgụn.
Ehabụ eze Izrẹlụ Ẹbamịn ugu sị Jehoshẹfatị eze Juda, “N'ị sọnjẹn m d'a maye Ramọtụ-Gilẹdị ọgụn?” Jehoshẹfatị nọ sị a, “Mmẹ lẹ ịyụ wụ ohu; ndị nke m lẹ ndị nke i wụzị ohu; ẹnyi jẹnkọ d'e sọnjẹn i agha hụ.”
Ya kẹ eze Izrẹlụ nọ kpọkikomẹ ndị-amụma nnụ, sị wẹ, “Nị ẹnyi jẹn Ramọtụ-Gilẹdị d'a lụsọn wẹ agha ra nị m gharị?” Wẹ nọ sị a, “Agụ, jẹn, nị Chuku k'e bu ẹ che i ẹka mẹri.”
Eze Izrẹlụ Ẹbamịn ugu nọ sị Jehoshẹfatị, “O nwọnghọ okẹnnyẹ ohu họdụnị nkẹ ẹnyi a gha ẹka a jụ Osolobuẹ, kanị ize ẹ e ze m e ze, makẹni o butunini m amụma rị mma, amụma eje-ihiẹn sụọ k'o buni m. Ẹfan a wụ Maịkaya nwa Imla.” Jehoshẹfatị nọ sị a, “Eze, ekulẹ ẹrịra.”
Eze Izrẹlụ lẹ Jehoshẹfatị eze Juda yi ẹwuru ndị-nze, nọdị ukpo wẹ, ebẹhụ wẹ nọ a kụkpọ ọka ẹhụ ọnụ-mgbọn obodo Sameria; ndị-amụma hụ ile hụ e buni wẹ amụma.
Zẹdikaya nwa Kenaana nkẹ gihụ mpịn o gi igwe mẹmẹrin, a sị, “Lee ihiẹn Osolobuẹ ku: ọ sị, ‘Mpịn ndịnị kẹ y'e gi sụngbu ndị Aram d'e runi a nwụnhụnchanrịn wẹ.’ ”
Ogẹn Maịkaya gi ru ẹ, eze nọ sị a, “Maịkaya, nị ẹnyi jẹn d'a maye ndị Ramọtụ-Gilẹdị ọgụn ra nị m gharị?” Ya Maịkaya nọ sị, “Eze, jẹn d'a maye ẹ, n'i k'e mẹri; Osolobuẹ k'e bu ẹ che i ẹka mẹri.”
Eze ndị Aram nkẹ a gwaọlẹ ndị ọkị-agha a e gi ụgbọ-ẹshin a lụ agha, sị, “Alụsọnkwọlẹ ni onyẹ ọwụlẹ agha — kẹ onyẹ-uku kẹ onyẹ-nta, mmanị eze Izrẹlụ sụọ.”
Ogẹn ndị ọkị-agha ahụn gi ụgbọ-ẹshin a lụ agha gi hụn Jehoshẹfatị, wẹ nọ sị, “Ẹhẹn, ọnwan wụ eze Izrẹlụ.” Ya wẹ nọ bu ihun zinmẹ ẹ nị wẹ maye ẹ, kanị Jehoshẹfatị nọ yi oro, Osolobuẹ nọ yen'ẹ ẹka — Osolobuẹ wụ Chuku e mẹ ihiẹn o mẹ, tẹrị wẹ pụ ebe ọ rị: