Ak kingosiirto kenyisiek alage kochortagei oldab Ahab eng’ Samaria. Ak kieng’ji Ahab inendet kechirek ak tuga che chang’ mising’, koboto bik che kimi ak inendet, ak kogaigai inendet kotogosta Ramot-gilead.
Ak kilenji Ahab laitoriatab Israel Jeosapat laitoriatab Juda, Ichame kebe tuwai Ramot-gilead? Ak kiwolji kolenji, A u kit ne i u, ak u bikyuk biguk; ak kimi koboten eng’ lugoni.
Ak kilenji laitoriatab Israel Jeosapat, Ta komi chito age ne kimuchi keteepse eng’ Jehovah: ago aweche; amu mamaoteni tuguk che miachen agobo ane, kobate yaitiet kotugul: inendet ko Mikaia weritab Imla. Kile Jeosapat, Amat komwa laitoriat ko u no.
Ak kiga tebe laitoriatab Israel ak Jeosapat laitoriatab Juda chi tugul ng’echerennyi ne bo laitornatet, kolaachi ngoroikwak che bo laitornatet, ak kitebi eng’ ole baraa eng’ ole kibunei eng’ ormarichetab Samaria; ak kimaoteni maotik tugul eng’ tainywa.
Ak kingoit inendet ole mi laitoriat, kolenji laitoriat inendet, Mikaia, kibe Ramot- gilead, anan kitebi? Ak kile, Otogoste, ak obor; ak kindoi eunekwok bichoto.
Ak kile, Kiageer Israel tugul ko kaiyesta eng’ tulonok, ko u kechirek che matinyei mestowot: ak kimwa Jehovah kole, Matinyei chuto kiptaiyat; ingoweek chi tugul kwo gonnyi eng’ kalyet.
Ak kile Mikaia, Ogas anyun ng’olyotab Jehovah: kiageer Jehovah kotebyei eng’ ng’echerennyi ne bo laitornatet, ak kitononi luget tugul ne bo kipsengwet eng’ eunnyi ne bo tai ak ne bo katam.
Ak kimong’ tamirmiriet ak kotonon eng’ taitab Jehovah, ak kole, Aberberi. Ak kimwachi Jehovah inendet, kolenji, Iberbertoi ano? Maotikyik tugul. Ak kimwa inendet kole, Iberberi inendet, ak iterter: ui anyun, ak iyai ko u noto.
Ak kile, Awendi ak aegu tamirmiriet ne kenisiei eng’ kutuswekab maotikyik tugul. Ak kimwa inendet kole, Iberberi inendet, ak iterter: ui anyun, ak iyai ko u noto.
Kilenji laitoriatab Israel Jeosapat, Awalegei aegu age, ak awe luget; ago ilaach inye ngoroik che bo laitornatet. Kowalgei anyun laitoriatab Israel koek age, ak koba luget.
Ak kingogeer kiptainichoto bo karisiek Jeosapat, komwa kole, Nito ko laitoriatab Israel. Koweekyigei anyun kole kobargei ak inendet: ago kiwaach Jeosapat, ak kitoret Jehovah inendet; ago kiigochi Kamuktaindet ichek kobagakta inendet.
King’i chito age kwangennyi komwok kosapsapchi, ak kitiech laitoriatab Israel ole tuiyechin karikyik che kiilaachi: kolenji anyun chito ne kweriei karinnyi, Imuta amanda eng’ oli mi luget; amu kagiguotena mising’.