|
| 1 |
|
| Iû-tāi -ông Iok-sa-hoat pêng-an tò-khì kàu Iâ-lō͘-sat-léng ê ông-kiong. |
|
| 2 |
|
| Hap-ná-nî ê kiáⁿ sian-kiàn Iâ-hō͘ chhut-lâi gêng-chiap Iok-sa-hoat -ông, kā i kóng, “Lí ná ōe khì pang-chān pháiⁿ-lâng, thiàⁿ oàn-hūn Siōng Chú ê lâng? In-ūi án-ni, Siōng Chú ê siū-khì ōe lîm-kàu lí. |
|
| 3 |
|
| M̄-kú lí iáu ū hó ê piáu-hiān; lí ū tùi chit-ê kok-ka hòe-tû A-sià-la lú-sîn ê thiāu-siōng, koh kian-sim koat-ì chhē-kiû Siōng-tè.” |
|
| 4 |
|
| Iok-sa-hoat tòa tī Iâ-lō͘-sat-léng; āu-lâi koh khì bîn-kan sûn-sī, tùi Pia̍t-sī-pa kàu Í-hoat-liân soaⁿ-khu, chhōa jîn-bîn kui-ǹg Siōng Chú — in lia̍t-chó͘ ê Siōng-tè. |
|
| 5 |
|
| I tī Iû-tāi choân-tōe ta̍k-ê kian-kò͘ ê siâⁿ siat-li̍p sím-phòaⁿ-koaⁿ. |
|
| 6 |
|
| I tùi hiah-ê sím-phòaⁿ-koaⁿ kóng, “Lín pān-sū tio̍h kín-sīn, in-ūi lín sím-phòaⁿ m̄-sī ēng lâng ê koân-ui, sī hōng Siōng Chú ê koân-pèng; lín sím-phòaⁿ ê sî, Siōng Chú ōe kap lín tông-chāi. |
|
| 7 |
|
| Taⁿ lín tio̍h kiaⁿ-ùi Siōng Chú, kín-sīn pān-sū, in-ūi Siōng Chú — lán ê Siōng-tè bô iông-ún put-gī, bô phian-thán, bô siu hóe-lō͘.” |
|
| 8 |
|
| Iok-sa-hoat tùi Lī-bī -lâng, chè-si, kap Í-sek-lia̍t cho̍k-tiúⁿ ê tiong-kan soán-phài lâng, tī Iâ-lō͘-sat-léng ūi Siōng Chú phòaⁿ-koat àn-kiāⁿ, tiâu-kái hun-cheng. In lóng tòa tī Iâ-lō͘-sat-léng. |
|
| 9 |
|
| I koh bēng-lēng in kóng, “Lín tio̍h kiaⁿ-ùi Siōng Chú, tiong-sim sêng-si̍t pān-lí tāi-chì. |
|
| 10 |
|
| Tòa tī ta̍k-ê siâⁿ ê tông-pau nā ū hun-cheng lâi chhē lín, bô-lūn sī ūi-tio̍h thâi-lâng, á-sī ūi-tio̍h lu̍t-hoat kap kài-bēng, kui-lē kap bēng-lēng chiah-ê tāi-chì, lín tio̍h kéng-kài in, m̄-thang tek-chōe Siōng Chú, chiah bián Siōng Chú ê siū-khì lîm-kàu lín kap lín ê tông-pau. Lín án-ni chòe, chiū bōe tì-kàu hoān-chōe. |
|
| 11 |
|
| Taⁿ, chong-kàu àn-kiāⁿ iû tōa-chè-si A-má-lī-ngá chòe chòe-āu ê chhâi-koat; bîn-sū àn-kiāⁿ iû Iû-tāi ê cho̍k-tiúⁿ Í-si̍t-má-lī ê kiáⁿ Se-pa-tē-ngá chòe chòe-āu ê chhâi-koat; Lī-bī -lâng chòe koaⁿ-tiúⁿ hia̍p-chō͘ lín. Lín tio̍h hó-táⁿ pān-sū. Goān Siōng Chú kap chèng-ti̍t ê lâng tông-chāi.” |
|
|
|
|