×

Ika Bible 2018

2 Ihiẹn Mẹni 19

1
Jehoshẹfatị eze Juda a hụnghọ isi lụakinhẹn obi-eze ẹ rị Jerusalẹm.
2
Ya kẹ Jehu onyẹ-amụma nwa Hanani nọ jẹn d'e kunrun ẹ, sị a, “Kị haịn i gi yeni eje-ịhịan ẹka, a nị ndị ize Osolobuẹ e ze a sụọ ị? Ufiri ẹ, Osolobuẹ rị e wen'i iwe.
3
Kanị, o nwọnghọ ezigbo ihiẹn ndị rị imẹ i, makẹni y'e wepụchanrịngụọ osisi ile wẹ zumẹni onyẹnnyẹ-mmọn wụ Ashẹra imẹ alị Juda lẹni y'e bugụọzị obi i che ife Chuku.”
4
Jerusalẹm kẹ Jehoshẹfatị bi. O jẹnsọnmẹ ebe ile ọ rị a kị gha Biẹshẹba d'e ru alị ugu Ifrem, e wekinhẹn wẹ ebe Osolobuẹ wụ Chuku ndị nẹdi wẹ rị.
5
O tumẹsọnmẹ ndị e dọnzi oku imẹ alị hụ, imẹ obodo-obodo ndị wẹ tụnhunmẹ mgbọn imẹ Juda.
6
Ọ sị wẹ, “Marịnkwọ nị ihiẹn ụnụ rị e mẹ, makẹni ẹlẹ ịhịan tumẹ ụnụ nị ụnụ e dọnzi oku, kama Osolobuẹ hụn rị ebẹhụ ụnụ rị ogẹn ọwụlẹ ụnụ rị a han eṅẹn.
7
A tụ nị nwan egun Osolobuẹ; e dọnrin ni ẹnya e dọnzi oku, makẹni, Osolobuẹ wụ Chuku ẹnyi achọnị mmẹgbu mọbụ igbeyeni ịhịan mọbụ ịna ọgị-azụụn.”
8
Jehoshẹfatị nọzị họrị ndị Livaị, ndị nchụn-ẹjan lẹ ndị-ichẹn rịsọnmẹ ikpụlọ Izrẹlụ tumẹ nị wẹ hụn ụzọ e mẹ ịhịan ile e gi Iwu Osolobuẹ e bi lẹ nị w'e dọnzini ndị bi imẹ Jerusalẹm oku.
9
Ọ nọ sị wẹ, “Ụnụ k'e girịrị egun Osolobuẹ rụn ọrụnnị, rụn a nke ịhịan-esi, gi akpakalị obi ụnụ rụn a.
10
Oku ọwụlẹ umunẹ ụnụ ndị bi imẹ obodo rị ichẹn-ichẹn buhẹni ụnụ, ọsụọn'a nị oku igbu-ọchụn mọbụ oku ọzọ gbasharị iwu lẹ ihiẹn ichẹn-ichẹn Chuku sị ẹnyi mẹ lẹ uhi mọbụ ọdịnalị rọ, a gbanị wẹ mkpịnsịn-ẹka ẹnya, sị wẹ emẹkwọlẹ Osolobuẹ njọ, amamgbe Osolobuẹ e buni ụnụ lẹ mmunẹ ụnụ olulu. E mẹ ni ihiẹnni, amamgbe ikpe a ma ụnụ.
11
“Amaria onyẹ-isi nchụn-ẹjan k'a kị ụnụ imẹ ihiẹn ọwụlẹ gbasharị Iwu Osolobuẹ; Zẹbadịa nwa Ishmẹlụ hụn wụ onyẹ-ndu Juda k'a kị ụnụ imẹ ihiẹn ọwụlẹ gbasharị iwu eze; ndị Livaị k'a gha e yeni ụnụ ẹka a rụn ọrụnnị. Egikwọlẹ ni egun rụn ọrụnnị; Osolobuẹ ya nọyeni ndị sikọ d'a rụn a ọhụnma!”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes