Ki wo Jehu weeriitap Hanani keerindet, kotorookta ineendet ak koleenji Laitoryat Jehoshaphat, “Tos yamin itoret kiptengekyot ak icham che wechei Kamuktaindet ne Toroor? Amu kiito, ko pwonjinin nereegek che punu taitap Kamuktaindet ne Toroor.
Ki leenji kirwoogichooto, “Obwaat kiit ne oyae, amu morwoochi agobo chii ago orwoochi agobo Kamuktaindet ne Toroor, mi ineendet kobootok ye oyae kirwooget.
Ingotebenok anyun kaiyweisyet ne oiywei Kamuktaindet ne Toroor, oriip ak oyai, amu ma mi tengekto eng' Kamuktaindet ne Toroor, Kamuktaindennyo anan ko tiytiyetap piik, ama taachei konunoik che kigoigoisye.”
Ki inde kogeny `Jehoshaphat Jerusalem alak eng' Lawiik ak tisiik, ak alak che po kandoigap kooriigap kwanisyegap Israel, agobo kirwoogetap Kamuktaindet ne Toroor ak agobo tuguuk che kamoiyo. Ak ki week koba Jerusalem.
Eng' peetuut age tugul ne kaityok ng'olyootap chii age tugul ne punu tupchosyekwok che menyei nganasookwak, agobo korotiik eng' korotiik, ak agobo ng'atuutik ak kayomisutik, kaneetisyosyek ak kirwoogutik, oteechi, si ma nam icheek tengekto eng' taitap Kamuktaindet ne Toroor, ak konyonjok nereeknateet, okweek ak tupchosyekwok. Oyai niito, si ma namak tengekto.
Keero, poiywok Amariah tisiindet ne oo eng' tuguuk tugul che po Kamuktaindet ne Toroor; ak koboiywok Sebadia weeriitap Ishmael, pounindetap kootap Judah eng' tuguuk tugul che po laitoryat, ak egu Lawiik kiptainik eng' taing'wong'. Oboisye eng' nyiganateet, ak kotebi Kamuktaindet ne Toroor kobooto ineendet ne yaei ne myee.”